„ლავასოღლის“ მხარდამჭერი აქციის მონაწილეებსა და სამართალდამცველებს შორის დაპირისპირება მოხდა. ვიდეო

ე.წ. კანონიერი ქურდის, მინდია გორაძის იგივე ლავასოღლის მხარდამჭერ აქციაზე დემონსტრანტებსა და სამართალდამცელებს შორის სიტყვიერი დაპირისპირება ფიზიკურში გადაიზარდა, რის შედეგადაც პოლიციამ 9 პირი დააკავა.

შსს-ს ინფორმაციით, გამოძიება მათ ადმინისტრაციულ სამართალდარღვევას, კერძოს პოლიციელის კანონიერი მოთხოვნისადმი დაუმორჩილებლობას ედავება.

ამ დროისთვის პოლიციამ აქციის მონაწილეები გზის სავალი ნაწილიდან გადაიყვანა. დაპირისპირების მიზეზი ცენტალური გზის ჩაკეტვა გახდა. აქციის მონაწილეები ასფალტზე ისხდნენ, პოლიციამ მათ მსვლელობის გაგრძელება ან გზის სავალი ნაწილიდან გადასვლა მოსთხოვა, რამაც აქციის მონაწილეების უკმაყოფილება გამოიწვია. როგორც „ლავასოღლის“ ადვოკატმა განაცხადა, პოლიციამ არაპროპორციული ძალა გამოიყენა.

აქციის მონაწილეებმა მსვლელობა გააგრძელეს და პროკურატურისკენ მიდიან.

„ლავასოღლის“ ახლობლები სარფის საბაჟოსთან აქციის გამართვას აპირებდნენ. ისინი მიიჩნევენ, რომ მინდია გორაძე საქართველოს მოქალაქეა, ის თურქეთში მძიმე პირობებშია და საქართველომ მის მდგომარეობაზე უნდა იზრუნოს.

ბათუმში, იუსტიციის სახლთან კარვებია გაშლილი და რამდენიმე ადამიანი შიმშილობს. „ლავასოღლის“ ახლობლები ე.წ. კანონიერი ქურდის საქართველოში ექსტრადირებას ითხოვენ.

ე.წ. კანონიერი ქურდობისთვის „ლავასოღლი“ საქართველოში ორჯერ არის გასამართლებული. 12 აპრილს ბათუმის საქალაქო სასამართლომ „ლავასოღლი“ დამნაშავედ ცნო და თავისუფლების 10 წლით აღკვეთა მიუსაჯა. გორაძე, რომელიც ინტერპოლის წითელი ცირკულარით იძებნებოდა, გასული წლის ოქტომბერში დააკავეს. ის ამჟამად თურქეთში, საექსტრადაციო პატიმრობაში იმყოფება. მისი ადვოკატის თქმით, პატიმრის ჯანმრთელობის მდგომარეობა დამძიმდა.