თორნიკე რიჟვაძე: ყველაფერს გავაკეთებთ, რომ 12 წლის გოგოს, რომლის ოჯახიც მეწყერის შედეგად დაიღუპა, ჰქონდეს აბსოლუტური მხარდაჭერა და გვერდში დგომა სახელმწიფოსგან

აჭარის მთავრობის თავმჯდომარემ, თორნიკე რიჟვაძემ ხელვაჩაურში მეწყერის შედეგად სახლის გარეშე დარჩენილ თიკო თედორაძეს სწავლის ხელშეწყობისთვის ლეპტოპი აჩუქა და ოჯახს ფინანსურად დაეხმარა. ამის შესახებ სოციალურ ქსელში თიკა თედორაძის ბებია გულნარა თედორაძე წერს.

„აჭარის მთავრობის თავმჯდომარის, ბატონი თორნიკესგან ჩვენმა ოჯახმა და ამ უდიდეს ტრაგედიას გადარჩენილმა პატარა გოგომ სწავლის ხელშეწყობისთვის მიიღო ლეპტოპი, მიიღო ასევე ფინანსური მხარდაჭერა. ყველაფერს აკეთებენ, რომ ბავშვს მაქსიმალურად დაეხმარონ ამ მძიმე პერიოდის დაძლევაში. რამდენადაც ჩემთვის ცნობილია, მთავრობის მხრიდან იგეგმება მხარდაჭერა და პატარა, დაობლებული გოგოს ბინით უზრუნველყოფა. ამ ყველაფრისთვის უღრმესი მადლობა”, - წერს გულნარა თედორაძე.

ხელვაჩაურში, სოფელ ქვედა ჯოჭოში, მეწყერმა ერთი საცხოვრებელი სახლი მთლიანად გაანადგურა. სახლში იმ დროს სამი ადამიანი იმყოფებოდა. მშობლებისა და 14 წლის ძმის ტრაგიკულად დაღუპვის შემდეგ 12 წლის თიკო თედორაძე ოჯახის წევრებისა და საცხოვრებელი სახლის გარეშე დარჩა.

მეწყერი ხელვაჩაურის რამდენიმე სოფელში, 200 ლოკაციაზე ჩამოწვა. უხვ-ნალექიანობა 1-ელ ოქტომბერს დაფიქსირდა.

თორნიკე რიჟვაძემ სტიქიის ზონაში მისვლის დღეს ჟურნალისტებთან განაცხადა, რომ მთავრობა მარტოდ დარჩენილ არასრულწლოვან გოგოს ყველანაირად დაეხმარება.

„ყველაფერს გავაკეთებთ, მას ექნება აბსოლუტური მხარდაჭერა და გვერდში დგომა სახელმწიფოსგან“, – განაცხადა რიჟვაძემ.