თემურ ხვიბლიანი, რომელიც ნიკა გვარამიამ ბანკზე თავდასხმაში დაადანაშაულა, საჯაროდ ბოდიშის მოხდას ითხოვს

შეიარაღებული ძალების წარმომადგენელი თემურ ხვიბლიანი, რომელიც „მთავარი არხის“ გენერალურმა დირექტორმა ნიკა გვარამიამ მის წყაროზე დაყრდნობით, „საქართველოს ბანკზე“ თავდასხმაში დაადანაშაულა, პირველ კომენტარს აკეთებს. ხვიბლიანი ბრალდებებს კატეგორილად უარყოფს, ზოგიერთ მედიასაშუალებას ცილისწამებაში ადანაშაულებს და საჯაროდ ბოდიშის მოხდას ითხოვს.

თემურ ხვიბლიანი აცხადებს, რომ ის თავდასხმის დღეს თბილისში იმყოფებოდა და ამ ფაქტს არაერთი მოწმე ჰყავს. მან ასევე ისაუბრა თავისი ნათესავის, დავით ხვიბლიანის მიმართ წაყენებულ ბრალდებებზე. მისი განცხადებით, დავით ხვიბლიანი იმ დღეს ბანკში ხელფასის ასაღებად იმყოფებოდა და ​თანამზრახველობაში მისი დადანაშაულება ცილისწამებას წარმოადგენს.

„ის, რომ მე ვყოფილვარ თავდამსხმელი, რომელიც ბანკში შეიჭრა, ასევე ის, რომ თანამზრახველად თურმე მყოლია მოქმედი სამხედრო მოსამსახურე დავით ხვიბლიანი, არის აბსოლუტური ტყუილი, ცრუ ბრალდება და გადაუმოწმებელი ინფორმაცია. სინამდვილეში, ლომის წვლილი მიუძღვის დავით ხვიბლიანს მძევლების უსაფრთხოდ გამოსვლაში. მოვითხოვ გარკვეული დოზით ბოდიშის მოხდასაც. წინააღმდეგ შემთხვევაში აუცილებლად მივმართავ სხვადასხვა სამართლებრივ საშუალებას“, - აცხადებს თემურ ხვიბლიანი.

ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ შეიარაღებულმა პირმა მძევლები 21 ოქტომბერს აიყვანა.

თავდამსხმელი შენობიდან 3 მძევალთან ერთად გამოვიდა. როგორც კადრებში გამოჩნდა, მას შენობის დატოვების დროს ერთი ხელი აწეული ჰქონდა და სავარაუდოდ ხელში ხელყუმბარა ეკავა.

22 ოქტომბერს, გამთენიისას შსს-მ გაავრცელა განცხადება, რომლის თანახმად, ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა და მათ სიცოცხლეს და ჯანმრთელობას საფრთხე არ ემუქრება. ხოლო დამნაშავის დაკავების მიზნით სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს.