კომპანია „ზიმო-ს“ ინფორმაციით, ფონდ „ქართუს“ ქუთაისის საერთაშორისო უნივერსიტეტში სამშენებლო სამუშაოების შემსრულებლების წინაშე ყველა ვალდებულება სრულად აქვს შესრულებული

კომპანია „ზიმო“ მედიაში გავრცელებულ ცრუ ინფორმაციასთან დაკავშირებით განცხადებას ავრცელებს.

„დღეს ერთ-ერთმა მედია საშუალებამ გაავრცელა ინფორმაცია სსიპ ქუთაისის საერთაშორისო უნივერსიტეტის კამპუსის ტერიტორიაზე მიმდინარე სამშენებლო მოედანზე დასაქმებული ადამიანების პროტესტის თაობაზე. პროტესტი ეხებოდა დამლაგებლებისთვის და დაქირავებული მუშებისთვის ხელფასების დაგვიანებას.

უნივერსიტეტის ტერიტორიაზე ფონდი „ქართუს“ ფინანსური მხარდაჭერით და დაკვეთით სამშენებლო სამუშაოებს ასრულებს კომპანია „ზიმო“, რომლის ქვეკონტრაქტორია ფირმა D&T.

სამშენებლო სამუშაოების დამკვეთი და დამფინანსებელია ფონდი „ქართუ“. ფონდ „ქართუს“ სრულად აქვს შესრულებული ყველა ვალდებულება, როგორც დამკვეთს, მათ შორის გადახდილია თანხები დღეის მდგომარეობით შესრულებული ყველა სამშენებლო სამუშაოსთვის.

მიუხედავად იმისა, რომ უნივერსიტეტის წინ შეკრებილი ადამიანები უშუალოდ არ წარმოადგენენ არც „ქუთაისის საერთაშორისო უნივერსიტეტი-ს“, არც ფონდ „ქართუს“ და არც კომპანია „ზიმოს“ თანამშრომლებს ან/და დაქირავებულ პირებს, კომპანია „ზიმოსა“ და სამშენებლო კომპანია D&T-ს შორის უკვე შედგა კომუნიკაცია, რის შედეგადაც ხელფასებთან დაკავშირებული პრობლემა აღმოიფხვრება უახლოეს საათებში“, - ნათქვამია განცხადებაში.