„ოცნების ქალაქში“ მცხოვრებლებმა ბათუმში ფრიდონ ხალვაშის გამზირი გადაკეტეს

„ოცნების ქალაქში“ მცხოვრებლებმა ბათუმში ფრიდონ ხალვაშის გამზირი გადაკეტეს. პოლიციამ გზის გახსნა მალევე შეძლო, საავტომობილო მოძრაობა დაახლოებით 15 წუთი იყო პარალიზებული.

აქციის მონაწილეები ინდივიდუალურ ხელშეკრულებებს ითხოვენ, რომ საცხოვრებლით ყველა დაკმაყოფილდეს. ვარაუდობენ, რომ პროექტი აღარ გაგრძელდება, 582 ბინა კი საკმარისი არ არის. ასევე ითხოვენ კრიტერიუმების დადგენას, რომლის მიხედვითაც განისაზღვრება, თუ ვის ეკუთვნის ბინა საცხოვრებელ კორპუსებში, რომლებიც ახლა შენდება. აქცია ხვალ ჯანდაცვის სამინისტროსთან გაიმართება.

როგორც აჭარის მთავრობაში აცხადებენ სპეციალური სამთავრობო კომისია „ოცნების ქალაქში“ მოსახლეობისთვის ბინების გადასაცემად საჭირო კრიტერიუმებზე მუშაობს.

„პროცესში ჩართულია „ოცნების ქალაქის“ მოსახლეობა და ისინი იღებენ მონაწილეობას კრიტერიუმების შემუშავებაში. „ოცნების ქალაქის“ კომისიის მუშაობაში საერთაშორისო ორგანიზაცია Unicef-ისა და წითელი ჯვრის, აჭარის ფინანსთა და ეკონომიკისა და ჯანდაცვის სამინისტროს, ასევე საქართველოს სახალხო დამცველის აპარატისა და აჭარის უმაღლესი საბჭოს წარმომადგენლები მონაწილეობენ.

ე.წ. ოცნების ქალაქის პროექტის განხორციელება აქტიურად მიმდინარეობს. ამ ეტაპზე სამშენებლო ტერიტორიაზე სამი 12-სართულიანი საცხოვრებელი ბინის მშენებლობა ხორციელდება. სამუშაოები პანდემიის დროსაც, შესაბამისი რეკომენდაციების დაცვით, უწყვეტად მიმდინარეობს. სამუშაო პროცესში დაახლოებით 120 ადამიანია დასაქმებული. ე.წ. ოცნების ქალაქის მშენებარე მრავალბინიანი საცხოვრებელი კომპლექსის ინდივიდუალური საცხოვრებელი ბინების (582 ბინა) გაზმომარაგების, შიდა წყალმომარაგებისა და შიდა კანალიზაციის ქსელის მოწყობის სამშენებლო სამუშაოების ელექტრონული ტენდერი მიმდინარე წლის 11 თებერვალს გამოცხადდა. წინადადებების მიღება 9 მარტს დასრულდება. შესყიდვის სავარაუდო ღირებულება 1 592 098 ლარს შეადგენს. ე.წ. ოცნების ქალაქის ტერიტორიაზე საცხოვრებელი სახლების მშენებლობის გადაწყვეტილება აჭარის მთავრობამ, იქ არსებული მძიმე სოციალური და შეუსაბამო საცხოვრებელი პირობების გამო მიიღო“, - ნათქვამია მთავრობის მიერ გავრცელებულ განცხადებაში.