თორნიკე რიჟვაძე: მაშველები მეთორმეტე საათია აკეთებენ შეუძლებელს. მართლა გმირულად, თავგანწირვით ცდილობენ ადამიანების გადარჩენას

მაშველები მეთორმეტე საათია აკეთებენ შეუძლებელს. მართლა გმირულად, თავგანწირვით ცდილობენ ადამიანების გადარჩენას, - ამის შესახებ „ქრონიკაში“ აჭარის მთავრობის ხელმძღვანელმა თორნიკე რიჟვაძემ განაცხადა.

„შესაბამისმა უწყებებმა ძალიან სწრაფად, ოპერატიულად უზრუნველყო ყველა შესაბამისი რესურსის გამოძებნა. 300-ზე მეტი მაშველია მობილიზებული და ისინი მუშაობენ ძალიან ინტენსიურად, რომ ეს სამაშველო ოპერაცია რაც შეიძლება მალე დასრულდეს“, - აღნიშნა რიჟვაძემ.

ბათუმში, 26 მაისის ქუჩაზე მომხდარი ნგრევის შემდეგ, მაშველებმა ნანგრევებიდან კიდევ ერთი ადამიანი, ახალგაზრდა კაცი ამოიყვანეს.

მანამდე, დაახლოებით ერთი საათის წინ, მაშველებმა ნანგრევებიდან ახალგაზრდა ქალი ამოიყვანეს. ის კლინიკაშია გადაყვანილი, სადაც მას სამედიცინო დახმარებას უწევენ.

ბათუმში, 26 მაისის ქუჩაზე, სადაც საცხოვრებელი კორპუსის სადარბაზო ჩამოინგრა, სამძებრო-სამაშველო ღონისძიებები გრძელდება. სადარბაზო, დაახლოებით, 12:00 საათზე ჩამოინგრა. დაშავებულთა შორის არასრულწლოვნებიც არიან. ერთ-ერთ მათგანს, ზედაპირული დაზიანებების გარდა, ქვედა კიდურის დაზიანებაც აღენიშნება.

შს მინისტრის, ვახტანგ გომელაურის განცხადებით, ნანგრევებში, დაახლოებით, 10-დან 15 ადამიანამდეა მოყოლილი. მისივე თქმით, მომხდარზე გამოძიება სამშენებლო სამუშაოს წარმოებისას უსაფრთხოების წესის დარღვევის მუხლით დაიწყო. სამაშველო ღონისძიებებს ადგილზე გაეცნო ირაკლი ღარიბაშვილი. მთავრობის მეთაურის განცხადებით, კორპუსის ნგრევისას დაშავებულებსა და დაზარალებულებს სახელმწიფო დაეხმარება.