დედოფლისწყაროს მერი: მიმდინარეობს მსხვილი პროექტები, რომლებიც მოსახლეობის ყოველდღიურობას გააუმჯობესებს

დედოფლისწყაროს მუნიციპალიტეტში მოსახლეობამ დიდი მხარდაჭერა გამოუცხადა „ქართული ოცნების“ გუნდს და მათ შორის, მეც, მესამედ გამოგვიცხადა ნდობა. ჩვენ უკვე გამოცდილები ვართ, ვიცით, რა უნდა გავაკეთოთ, - ამის შესახებ დედოფლისწყაროს მერმა ნიკოლოზ ჯანიაშვილმა, საქართველოს პრემიერ-მინისტრ ირაკლი ღარიბაშვილისა და ადგილობრივი თვითმმართველობის არჩევნებში გამარჯვებული მერების შეხვედრის შემდეგ განაცხადა, რომელიც მთავრობის ადმინისტრაციაში გაიმართა.

მისი თქმით, მუნიციპალიტეტში მოსახლეობაში ყოველდღიურობის გაუმჯობესების მიზნით მსხვილი პროექტები ხორციელდება.

„პირველ რიგში, აღსანიშნავია, სასმელი წყლის პრობლემის მოგვარება, რაც მომავალ წელს დასრულდება და პირველად, დედოფლისწყაროს ისტორიაში, მთელს მუნიციპალიტეტს ექნება 24-საათიანი წყალმომარაგება. გარდა ამისა, მიმდინარეობს სხვადასხვა ტიპის სამუშაოები, იქნება ეს საგზაო ინფრასტრუქტურის მოწესრიგება, საბავშვო ბაღებში მდგომარეობის გამოსწორება, თუ სხვა იმ საჭიროებებისა და პრობლემების აღმოფხვრა, რომელიც ჩვენს მოსახლეობას აწუხებს და რომელიც აუცილებლად გადაიჭრება, იმიტომ, რომ ადგილობრივი თვითმმართველობა ყველაზე ახლოს არის თავის მოსახლეობასთან და ყველაზე მეტად ვიცით, რა არის ის პრობლემები, რომელთა გადაჭრაც ხელს შეუწყობს ჩვენი მუნიციპალიტეტის განვითარებას“, - აღნიშნა დედოფლისწყაროს მერმა.