არჩილ ჩიქოვანი: ბათუმის ბიუჯეტში ასახულია ყველა ის მიმართულება, რომელიც ჩვენი ქალაქის სამომავლო განვითარებისთვის, ჩვენი მოქალაქეების სოციალური პრობლემების მოგვარებისა და ქალაქის ნორმალურად ფუნქციონირებისთვისაა საჭირო

ბათუმის მერის, არჩილ ჩიქოვანის განცხადებით, ქალაქის მომავალი წლის ბიუჯეტში სრულადაა ასახული მოსახლეობის საჭიროებები, თუმცა, ამის მიუხედავად, ოპოზიციამ კვლავ დესტრუქციის გზა აირჩია და განვითარებისთვის ხელის შეშლა სცადა.

„ეს არის ბათუმის ისტორიაში უპრეცედენტო ბიუჯეტი, როგორც ხარჯვითი, ასევე, აღნიშნული ბიუჯეტი, წინა წლის სასტარტო ბიუჯეტთან შედარებით, 103 მილიონი ლარითაა გაზრდილი, კორექტირებულ ბიუჯეტთან შედარებით კი - 49 მილიონი ლარით. აღნიშნულ ბიუჯეტში ასახულია ყველა ის მიმართულება, რომელიც ჩვენი ქალაქის სამომავლო განვითარებისთვის, ჩვენი მოქალაქეების სოციალური პრობლემების მოგვარებისა და ქალაქის ნორმალურად ფუნქციონირებისთვისაა საჭირო. პოლიტიკურმა ოპონენტებმა, როგორც ყოველთვის, სწორება დესტრუქციაზე გააკეთეს, რათა ქალაქში ინფრასტრუქტურული პროექტები შეჩერებულიყო და კრიზისი შექმნილიყო“, - აღნიშნა არჩილ ჩიქოვანმა.

„ნაციონალური მოძრაობის“ მცდელობის მიუხედავად, ჩაეშალათ საკრებულოს დღევანდელი სხდომა, აჭარის მომავალი წლის ბიუჯეტი უკვე დამტკიცებულია. მთავარი საფინანსო დოკუმენტით განსაზღვრული თანხა 254 მილიონი ლარია.

დეპუტატები სხდომათა დარბაზში ტექნიკური შესვენების გამოცხადების შემდეგ დაბრუნდნენ. სამართალდამცველებმა „ნაციონალური მოძრაობის“ წარმომადგენლებს დარბაზი მას შემდეგ დაატოვებინეს, რაც პარტიის ერთ-ერთმა წევრმა, მირდატ ქამადაძემ სხდომათა დარბაზში სპეციფიკური ნივთიერება დაასხა, რომელსაც მძაფრი სუნი აქვს. ამ დროისთვის, ისინი შენობის მიმდებარედ მართავენ აქციას.

იქამდე, „ნაციონალური მოძრაობის“ წევრები ბათუმის მერ არჩილ ჩიქოვანსა და საკრებულოს დამოუკიდელ დეპუტატ რაულ თავართქილაძე დაუპირისპირდნენ.