კაცი, რომელიც თამაზ გინტურთან და ლევან დოთიაშვილთან ერთად იმყოფებოდა, ინციდენტის დღეს იხსენებს

თამაზ პაპიტაშვილი, რომელიც კირბალში მდებარე ტაძართან თამაზ გინტურთან და ლევან დოთიაშვილთან ერთად იმყოფებოდა, აცხადებს, რომ ტერიტორია ინციდენტამდე ცოტა ხნით ადრე დატოვა, სახლისკენ მიმავალმა კი სამი გასროლის ხმა გაიგო.

„მე წამოვედი და შემდეგ რა მოხდა, იცის მან, ვინც დაჭერილია. გასროლის ხმა სოფელში რომ ჩამოვედი, მერე გავიგონე. ავტრიალდი უკან და სავსე იყო იქაურობა პოლიციელებით. რამდენიმე ხნის შემდეგ მანქანა [თამაზ გინტურის] ჩამოაგორეს, სასწრაფო ავიდა და წამოიყვანეს ის ბიჭი“, - ამბობს პაპიტაშვილი.

სახელმწიფო უსაფრთხოების სამსახურის ინფორმაციით, სოფელ კირბალის მიმდებარედ, ოკუპირებულ ტერიტორიაზე, ადგილობრივი მცხოვრების უკანონოდ დაკავების მცდელობისას რუსეთის საოკუპაციო ძალების მიერ სროლის შედეგად გარდაიცვალა საქართველოს მოქალაქე და უკანონოდ დააკავეს ერთი ადამიანი.