„თიბისიზე“ კიბერშეტევის საქმის გამოძიების ფარგლებში კომპიუტერებია ამოღებული

"თიბისი ბანკზე" განხორციელებული კიბერთავდასხმის საქმის გამოძიებასთან დაკავშირებით, რუსთაველის N12-დან კომპიუტერები ამოიღეს. ამის შესახებ შინაგან საქმეთა მინისტრის მოადგილემ ნათია მეზვრიშვილმა განაცხადა.

მისი თქმით, გამოძიება რამდენიმე თვეა მიმდინარეობს და ეს კომპლექსური სისხლის სამართლის საქმეა და რამდენიმე დღეში ან ერთ კვირაში ვერ დასრულდება.

"ამოღებულია კომპიუტერები, მათ შორის რუსთაველის 12 ნომრიდან. მიმდინარეობს ინფორმაციის დამუშავება, შესწავლა. არ არის საკმარისი დრო კომპიუტერული ინფორმაცის დამუშავებისთვის. ვერ გეტყვით, როდის დასრულდება გამოძიება, ამ ყველაფერს დრო სჭირდება. კოკა ყანდიაშვილი ამ ეტაპზე გამოკითხული არ არის. როგორც კი ამის საჭიროება დადგება, აუცილებლად დაიკითხება", - განაცხადა ნათია მეზვრიშვილმა.

მოგვიანებით, ამ საკითხთან დაკავშირებით კომენტარი მამუკა ხაზარაძემ გააკეთა. „თიბისი ბანკზე“ კიბერშეტევის საქმეზე, როგორც ვიცი, გამოძიება მიმდინარეობს, თუმცა რა ეტაპზეა, მე ვერ გეტყვით", - თქვა ხაზარაძემ. 

„დეტალებს ვერ გეტყვით. ვფიქრობ, წერილები ცნობილია თქვენთვის, წერილებში წერია, რომ ჩვენმა საინფორმაციო უზრუნველყოფის დეპარტამენტმა აღმოაჩინა სიგნალი, მისამართებიც, აიპის მისამართებიც და ქუჩის და ოფისის მისამართებიც. ეს გადავეცით ღიად, საჯაროდ შინაგან საქმეთა სამინისტროს. შესაბამისად, როგორც ვიცი და ინფორმაცია მაქვს, ისევე, როგორც თქვენ იცით, მიმდინარეობს გამოძიება. მე ვერ გეტყვით გამოძიება რა ეტაპზეა“, - განაცხადა მამუკა ხაზარაძემ.

"თიბისი ბანკზე" კიბერშეტევა 2018 წლის ზაფხულში სცადეს. ამის შესახებ ბანკის დამფუძნებლის, მამუკა ხაზარაძის მიერ შს მინისტრისთვის გაგზავნილ წერილებში წერია. წერილის თანახმად, ბანკზე კიბერშეტევის მცდელობა 2018 წლის 16 ივლისს მოხდა. პირველი წერილი შინაგან საქმეთა სამინიტროს გასული წლის 17 ივლისს გაუგზავნეს. ერთი თვის შემდეგ "თიბისი ბანკმა" დაადგინა, რომ შეტევა რუსთაველის ნომერ 12-ში მდებარე ყოფილი კავშირგაბმულობის სამინისტროს შენობიდან მოხდა და ინფორმაცია სამინისტროს აცნობა.

შეგახსენებთ, რომ საქართველოს გენერალური პროკურატურა „თიბისი ბანკის საქმესთან“ დაკავშირებით გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონ დოლარზე.