გახარია: ვინც შსს-ს თანამშრომლებზე ფიზიკურად იძალადა კანონით აგებს პასუხს

შინაგან საქმეთა მინისტრმა გიორგი გახარიამ, პანკისის ხეობის მოსახლეობასთან შეხვედრა გამართა. მინისტრმა მათთან მოლაპარაკების შემდეგ განაცხადა, რომ შეთანხმება მიღწეულია და კომპანიის წარმომადგენლები  გააგრძელებენ ადგილობრივ მოსახლეობასთან საუბარს, ხოლო შინაგან საქმეთა სამინისტროს სპეციალური დანიშნულების ქვედანაყოფები ხეობას დატოვებენ, თუმცა, პოლიციის გაძლიერებული შემადგენლობა ხეობაში დარჩება. ინფორმაციას შსს ავრცელებს. 

„დღევანდელი შემთხვევა იყო ყველასთვის ძალიან მძიმე, პირველ რიგში რა თქმა უნდა ეს შემთხვევა იყო უმძიმესი ხეობის მოსახლეობისთვის და საქართველოს პოლიციისთვის. სამწუხაროდ, მოხდა ის, რაც არ უნდა მომხდარიყო, მაგრამ აი ამ უხუცესი ადამიანების სიბრძნისა და სახელმწიფოს თმენის ვალდებულების გათვალისწინებით, ჩვენ მივაღწიეთ ისეთ შეთანხმებას, რომელიც მოუტანს სარგებელს ამ კონკრეტულ ხეობას, კონკრეტული სოფლების მცხოვრებლებს, ასევე, გააძლიერებს ჩვენს მეგობრობას მომავალში და ჩვენს ძმობას, ერთიანი, განუყოფელი საქართველოს მშენებლობისათვის. რაც შეეხება ჩვენს შეთანხმებას, ჩვენი შეთანხმება არის ძალიან მარტივიც და ამავდროულად, რთულიც, მაგრამ მიღწევადი და პრაგმატული. რა თქმა უნდა, ყველა ის ადამიანი, რომელმაც ფიზიკურად იძალადა შინაგან საქმეთა სამინისტროს თანამშრომლებზე, კანონის სრული შესაბამისობით აგებს პასუხს - ეს ერთი. მეორე - ჩვენ ასევე შევთანხმდით, რომ კომპანიის წარმომადგენლები გააგრძელებენ ადგილობრივ მოსახლეობასთან საუბარს და სანამ მხარდაჭერის კონკრეტულ ზღვრულ რაოდენობას არ მიაღწევენ, ისინი ამ ერთ კონკრეტულ შემთხვევაში გააგრძელებენ მათთან საუბარს. თუმცა, აქ არის კიდევ რამდენიმე სხვა პროექტი, რომელზეც აქტიურად დაიწყება მუშაობა. ამასთან ერთად, შინაგან საქმეთა სამინისტროს სპეციალური დანიშნულების ქვედანაყოფები ხეობას დატოვებენ, თუმცა, შინაგან საქმეთა სამინისტროს გაძლიერებული პოლიცია დარჩება ხეობაში და დაიცავს სრულად მართლწესრიგს და თითოეული ჩვენი მოქალაქის უსაფრთხოებას. ამ დროისთვის შეგვიძლია ვთქვათ, რომ ჰესის მშენებლობასთან დაკავშირებით საუბარი და მოლაპარაკებები გრძელდება. ჩვენ მივაღწიეთ კონკრეტულ და ძალიან მნიშვნელოვან შედეგებს“, - განაცხადა გიორგი გახარიამ.

პანკისის ხეობაში ხეობის უხუცესებს შეხვდნენ შს მინისტრი გიორგი გახარია, ინფრასტრუქტურის მინისტრი მაია ცქიტიშვილი, გარემოს დაცვის მინისტრი ლევან დავითაშვილი. შეხვედრის შემდეგ ცნობილი გახდა, რომ გარკვეულ საკითხებზე შეთანხმდნენ. კერძოდ, ჰესის მშენებლობასთან დაკავშირებით გაგრძელდება მოლაპარაკებები, აქციები შეწყდება, პანკისის ხეობას სპეცრაზმი დატოვებს, თუმცა პოლიცია დარჩება ადგილზე.

გიორგი გახარიას განცხადებით, პანკისში ჰესი იმ შემთხვევაში აშენდება, თუ ადგილობრივი მცხოვრებლების 90% მხარს დაუჭერს მას. 

პანკისის ხეობაში განვითარებულ მოვლენებზე განცხადება გაავრცელა საქართველოს მთავრობის ადმინისტრაციამ, რომელშიც მოქალაქეებს მოუწოდებს, არ აჰყვნენ პროვოკაციას. 

საგანგებო სიტუაციების მართვის სამსახურის ცნობით, პანკისის ხეობაში დაპირისპირების გამო სასწრაფო სამედიცინო დახმარება აღმოუჩინეს 35 ადამიანს. მათ შორის პოლიციელებიც არიან, რომლებიც საავადმყოფოში გადაიყვანეს.