გიორგი გახარია: ჰესი მაშინ აშენდება თუ მოსახლეობის 90% დაუჭერს მხარს

პანკისის ხეობაში შს მინისტრს გიორგი გახარიას, მინისტრთა კაბინეტის წარმომადგენლებსა და პანკისის უხუცესთა საბჭოს წევრებს შორის შეხვედრა დასრულდა. შენობა მოალაპარაკების ყველა მხარემ უკვე დატოვა.

როგორც შეხვედრის ერთ-ერთმა ადგილობრივმა მონაწილემ თქვა, მხარეები შეთანხმდნენ, რომ სპეცრაზმი ხეობიდან გავა, პოლიცია კი დარჩება. ასევე შეთანხმდნენ, რომ გარკვეულწილად შეთანხმება მიღწეულია და ჰესის მშენებლობა შეჩერდება, მოსახლეობის პროტესტი კი შეწყდება. 

შს მინისტრმა გიორგი გახარია კი მოქალაქეებს უთხრა, რომ ჰესი იმ შემთხვევაში აშენდება, თუ მოსახლეობის 90% დაუჭერს ამას მხარს.

"რაც დღეს მოხდა ჩვენს ურთიერთობებს და ძმობას არ შეეფერება. დღეს არავინ ვაპირებთ მტყუანის და მართლის ძებნას. ახლა ყველა უნდა გავჩერდეთ და დავმშვიდდეთ, მერე გავარკვიოთ სად შეგვეშალა, ვინ არის დამნაშავე. ახლა ვჩერდებით და ვაგრძელებთ დიალოგს. თუ ვინმე გადავიდა და დაარღვია კანონი, ეს ცალკე სალაპარაკოა. ჰესს რაც შეეხება, ამ ჰესის მშენებლები თქვენთან ლაპარაკს გააგრძელებენ და რაზეც შეთანხმდება ადგილობრივი მოსახლეობა, ის გადაწყვეტილება იქნება მიღებული. ქვების სროლა გამოსავალი არ არის. უნდა დავმშვიდდეთ და გავაკეთოთ ის, რაც ჩენს ძმობას, ურთიერთობას და საუკუნოვან ურთიერთობას შეეფერება. მადლობას ვუხდი ამ ბრძენ ხალს, რომელმაც თავისი სათქმელი გვითხრა. ისინი გეტყვიან, რაც გადავწყვიტეთ. თუ კითხვები გაქვთ, მკითხეთ და გიპასუხოებთ. 90% თუ დაუჭერს მხარს, მაშინ აშენდება ჰესი. ჰესის გამო აქ არ ამოვსულვარ, იმიტომ ამოვედი, რომ ქვები ესროლეთ ფორმიან ადამიანებს. თითოეულ კადრს გავაანალიზებთ და ვნახავთ, ვინ ვის რა ესროლა", - განაცხადა შს მინისტრმა პანკისელებთან საუბრისას. 

პანკისის ხეობაში დღეს დილიდან მოქალაქეები ჰესის მშენებლობას აპროტესტებენ. პროტესტს პოლიციასა და აქციის მონაწილეებს შორის დაპირისპირება მოჰყვა. სპეცრაზმმა აქციის მონაწილეების წინააღმდეგ ცრემლმდენი გაზი გამოიყენა. 

ამ დროისთვის პანკისში არიან შს მინისტრი გიორგი გახარია, ვიცეპრემიერი და ინფრასტრუქტურის მინისტრი მაია ცქიტიშვილი და გარემოს დაცვისა და სოფლის მეურნეობის მინისტრი ლევან დავითაშვილი. მესამე სექტორი პანკისის მოვლენების გამო ეკონომიკის მინისტრ ნათია თურნავას გადადგომას ითხოვს. სახალხო დამცველი ნინო ლომჯარია კი მზადაა მოლაპარაკებაში ჩაერთოს. ის პანკისის ხეობაში გაემგზავრა. მოვლენებს გამოეხმაურა პრეზიდენტი სალომე ზურაბიშვილიც.

პანკისის ხეობაში სპეცრაზმსა და აქციის მონაწილეებს შორის დაპირისპირების გამო, სამედიცინო დახმარება 27 ადამიანს აღმოუჩინეს, მათ შორის 12 ადგილობრივს და 15 სპეცდანიშნულების თანამშრომელს. დაშავებული შინაგან საქმეთა სამინისტროს 8 თანამშრომელი გადაყვანილია კლინიკაში.