ნინოწმინდის ბაღების გაერთიანების დირექტორი დეპუტატს სექსუალურ შევიწროებაში ადანაშაულებს

ნინოწმინდის ბაღების გაერთიანების დირექტორი ნარინე გინოსიანი ადგილობრივ მაჟორიტარ დეპუტატს „ქართული ოცნებიდან“ ენზელ მკოიანს სექსუალურ შევიწროებაში ადანაშაულებს. ინფორმაციას ამის შესახებ „სამხრეთის კარიბჭე“ ავრცელებს.

ნარინე გინოსიანი და მისი ბუღალტერი ანჟელიკა ფუტულიანი, ფინანსთა სამინისტროს საგამოძიებო სამსახურმა პასუხისგებაში 19 ივლისს მისცა. მათ ბრალი სისხლის სამართლის კოდექსის 182-ე მუხლით ედებათ, რაც მითვისებასა და გაფლანგვას გულისხმობს.

საქმის მასალების მიხედვით, გამოძიება ორივე დაკავებულს 9000-მდე ლარის მითვისებასა და გაფლანგვას ედავება. საუბარია თანხებზე, რომლებსაც ბაღების დირექტორი სამსახურიდან წასული თანამშრომლების ნაცვლად დროებით მოვალეობის შემსრულებლებს დამატებითი ანაზღაურების სახით უხდიდა.

„როდესაც თანამშრომლები სამსახურიდან მიდიოდნენ, ვიდრე ახალს აიყვანდა, მის საქმეს სხვა თანამშრომლებს აკეთებინებდა და მერე დამატებით თანხას უხდიდა. ასეთი შემთხვევები მხოლოდ ორ ან სამ თვეს გრძელდებოდა ხოლმე. გამოძიება კი ნარინეს და მის ბუღალტერს, სწორედ ამ თანხების მითვისებას ედავება, რაც არ მომხდარა“, – განმარტავს ადვოკატი მირიან ნიკოლაძე.

ნარინე გინოსიანი მის წინააღმდეგ დაწყებულ გამოძიებაში ნინოწმინდისა და ახალქალაქის მაჟორიტარ დეპუტატს ენზელ მკოიანს ადანაშაულებს. იგი „სამხრეთის კარიბჭესთან“ ჰყვება, რომ მკოიანს მის მიმართ პირადი ინტერესები ჰქონდა და დაემუქრა კიდეც.

„ჩემთან სექსუალური კავშირის დამყარება უნდოდა და მეუბნეოდა, რომ ახალ მანქანას მიყიდდა, ბინას გამირემონტებდა, საფრანგეთში წამიყვანდა და ასე შემდეგ. ტელეფონზეც მელაპარაკა. ერთხელ, კაბინეტში საქმეზე მივედი და კიდევ ასეთი შინაარსის საუბარი დაიწყო. ჩემგან კატეგორიული უარი რომ მიიღო, ბაღში საქმის გაფუჭებით დამემუქრა“,– ამბობს ნარინე გინოსიანი.

ამ ბრალდებასთან დაკავშირებით, ენზელ მკოიანს კომენტარი ჯერ არ გაუკეთებია. 

გინოსიანის ადვოკატი მირიან ნიკოლაძე ამბობს, რომ ენზელ მკოიანის წინააღმდეგ განცხადებით როგორც გენერალურ ინსპექციას, ასევე სამცხე-ჯავახეთის საოლქო პროკურატურას მიმართა, მაგრამ ამ დრომდე პასუხი არ მიუღია.

„საქართველოს ახალგაზრდა იურისტთა ასოციაციის“ იურისტი ქეთი ბებიაშვილი ამბობს, რომ ბაღის დირექტორის განცხადება სისხლის სამართლის ნიშნებს შეიცავს და ამაზე რეაგირება პროკურატურამ უნდა მოახდინოს, შემდეგ კი პარლამენტს მკოიანისათვის უფლებამოსილების შეწყვეტის თაობაზე მიმართოს.

ნარინე გინოსიანისა და ანჟელიკა ფუტულიანის საქმეზე წინასასამართლო სხდომა სექტემბრის დასაწყისში ჩაინიშნა.