ვაჟა სირაძე: პარლამენტის ტერიტორიაზე არანაირი ცეცხლსასროლი იარაღი არ არის

შინაგან საქმეთა სამინისტროს საპატრულო პოლიციის დეპარტამენტის უფროსმა ვაჟა სირაძემ პარლამენტის პერიმეტრზე იარაღის შეტანის შესახებ ინფორმაცია განმარტა. 

მისი ინფორმაციით, „პარლამენტში და მის გარე პერიმეტრზე განთავსებულია შესაბამისი პოლიციური ძალები, მათ შორის, განსაკუთრებულ დავალებათა დეპარტამენტის წარმომადგენლები მცირე რაოდენობით. 

რაც შეეხება სპეცდანიშნულების რაზმის აღჭურვას, ისინი აღჭურვილები არიან შს მინისტრის ბრძანების შესაბამისად და არა თუ ვინჩესტერები, არანაირი ცეცხლსასროლი იარაღი პარლამენტის ტერიტორიაზე არ არის“. 

„ამის გარანტიას მე გაძლევთ და ამაზე მე ვარ პასუხისმგებელი“, - განუცხადა სირაძემ ჟურნალისტებს. 

„ვადასტურებ ამ ინფორმაციას, თუმცა მხოლოდ და მხოლოდ იმისთვის არიან, რომ საჭიროების შემთხვევაში დაიცვან საზოგადოებრივი წესრიგი და უსაფრთხოება. იცით, რომ დღეს დაანონსებულია საპროტესტო აქცია. რაიმე სიტუაციის გამწვავებას თუ ექნება ადგილი, ეს ძალები დაიცავენ საზოგადოების უსაფრთხოებას, ასევე მოგეხსენებათ, რომ პარალელურად რუსთაველზე იმართება მეორე აქციაც, პოლიცია ახლოს უნდა იყოს. იმ შემთხვევაში, თუკი ამ ორი აქციის მონაწილეებს შორის მოხდება კონფლიქტი, სამართალდამცველები დროულად უნდა ჩაერიონ“, - აღნიშნა საპატრულო პოლიციის დეპარტამენტის უფროსმა. 

მთავარმა არხმა დღეს გაავრცელა ინფრმაცია, რომ პარლამენტის ტერიტორიაზე სპეცრაზმია მობილიზებული და ადგილზე ასევე შეიტანეს იარაღი. 

რუსთაველის გამზირზე 15:00 საათზე დაგეგმილ აქციას რეგიონებიდანაც უერთდებიან. 

ოპოზიცია სამოქალაქო სექტორთან ერთად მასშტაბური საპროტესტო აქციისთვის ემზადება. აქციის მონაწილეები ვადამდელი საპარლამენტო არჩევნების პროპორციული საარჩევნო სისტემით ჩატარებას, ცესკოს შემადგენლობის შეცვლასა და დროებითი ტექნიკური მთავრობის შექმნას ითხოვენ.

რუსთაველის გამზირზე 20-მდე კარავია გაშლილი, მათ შორის ერთი დიდი კარავი, რომელშიც ოპოზიციური პარტიების საკონსულტაციო შტაბია განთავსებული. საპროტესტო აქციის მონაწილეები ამბობენ, რომ მოთხოვნების შესრულებამდე აქციას არ შეწყვეტენ და ხელისუფლებას ამ მოთხოვნებს მშვიდობიანი გზით შეასრულებინებენ. 

აქცია პარლამენტის მიერ პროპორციული საარჩევნო სისტემისთვის საჭირო ცვლილების ჩაგდებას მოჰყვა. 

შეკრებას წინ უძღოდა შეხვედრები „ლეიბორისტული“ პარტიის ოფისში, სადაც პოლიტიკოსები შეთანხმდნენ ფორმულაზე-„ყველა მინუს ივანიშვილი“.

პარალელურად, 17 ნოემბერს, 17:00 საათზე რესპუბლიკის მოედანზე დაგეგმა მანიფესტაცია „პატრიოტთა ალიანსმა“, რომელსაც ორგანიზაცია „ქართული მარშიც“ შეუერთდება.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.

საპარლამენტო უმრავლესობა განმარტავს, რა სისტემით ჩატარდება 2020 წლის არჩევნები. განცხადება გაავრცელა მმართველი პარტიის ლიდერმაც. ოპოზიციური პარტიები მხარდამჭერებს პარლამენტთან აქციაზე მისვლისკენ მოუწოდებენ. 

ვინ დაუჭირა მხარი და ვინ იყო პროპორციულ საარჩევნო სისტემაზე გადასვლის წინააღმდეგი, ამ ბმულზე ნახეთ.