პროკურორმა ძმებ ფეიქრიშვილების საქმესთან ვატო ყიფიანის კავშირი დაადასტურა

ძმებ გიორგი და დავით ფეიქრიშვილების მკვლელობის მომზადების საქმესთან ვატო ყიფიანის კავშირს „ქრონიკას“ საქმის პროკურორიც უდასტურებს. ის ამბობს, რომ ბათუმის ეპიზოდზე ასაფეთქებელი მოწყობილობის დამზადება ასლან აბაშიძის დაცვის ყოფილ წევრებს სწორედ უკრაინაში მყოფმა კრიმინალურმა ავტორიტეტმა დაუკვეთა.

სახელმწიფო ბრალმდებელმა გიორგი კავსაძემ დაადასტურა ინფორმაცია იმის შესახებ, რომ ამ საქმის ერთ-ერთი მთავარი ფიგურანტი კრიმინალური ავტორიტეტი ვატო ყიფიანია. მისი თქმით, საქმეში არსებობს პირდაპირი მტკიცებულებები იმისა, რომ ყიფიანმა უკრაინიდან დაუკვეთა დაკავებულ პირებს ასაფეთქებელი მოწყობილობის შეძენა-შენახვა-დამზადება. 

პროკურორი ასევე ამბობს, რომ მტკიცებულებებს შორის არის მოწმეთა პირდაპირი ჩვენებებიც, რომლებიც ვატო ყიფიანის მონაწილეობას ადასტურებს. საქმეში არსებობს ვატო ყიფიანის და ერთ-ერთი დაკავებულის, ასლან აბაშიძის დაცვის ყოფილ წევრს როლანდ ბერიძეს შორის ინტერნეტმიმოწერა. ამას ადასტურებს ბერიძის ადვოკატიც, თუმცა, მისი თქმით, ბერიძე და ყიფიანი წლების განმავლობაში მეგობრობენ და ეს მიმოწერა ძმები ფეიქრიშვილების შეკვეთილ მკვლელობას არ უკავშირდება.

სახელმწიფო უსაფრთხოების სამსახურის კონტრტერორისტულმა ცენტრმა და უკრაინის უსაფრთხოების სამსახურმა, თბილისში დაგეგმილი, აფეთქებით ორი პირის შეკვეთილი მკვლელობა აღკვეთეს. სუსმა ჯამში შვიდი ადამიანი დააკავა, მათ შორის ოთხი დააკავეს ბათუმში, მათგან რამდენიმე განმაღმველია და არ არის გამორიცხული, რომ რომელიმე მათგანი ძალოვანი უწყების ყოფილი თანამშრომელი იყოს.

გამოძიება დამამძიმებელ გარემოებებში ჯგუფურად, ორი ან მეტი პირის მიმართ, შეკვეთით, განზრახ მკვლელობის მომზადების და ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა-შენახვის, დამზადების და გასაღების ფაქტზე მიმდინარეობს.