ბორჯომის მერს აღკვეთის ღონისძიებად პატიმრობა შეეფარდა

თბილისის საქალაქო სასამართლომ ბორჯომის მერს, ლევან ლიპარტიასა და მასთან ერთად დაკავებულ ბიზნესმენ გიორგი ულუმბეგაშვილს აღკვეთის ღონისძიებად პატიმრობა შეუფარდა.

სასამართლო პროცესზე პროკურორმა დაკავებული პირებისთვის აღკვეთის სახით პატიმრობის შეფარდება მოითხოვა და ამის მიზეზად მიმალვა, მტკიცებულებათა განადგურება და მოწმეებზე შესაძლო ზემოქმედება დაასახელა. ადვოკატმა კი მისი დაცვის ქვეშ მყოფისთვის 20 000-ლარიანი გირაოს შეფარდება მოითხოვა და აღნიშნა, რომ დაკავებული გამოძიებასთან თანამშრომლობისთვის მზად არის.

გიორგი ულუმბეგაშვილის ადვოკატმა აღკვეთის სახით 5000-ლარიანი გირაოს შუამდგომლობა დააყენა. მოსამართლემ არ დააკმაყოფილა ადვოკატების შუამდგომლობა და ბრალდებულებს პატიმრობა შეუფარდა.

მანამდე პატიმრობა ამავე საქმეზე დაკავებულ ბორჯომის საკრებულოს თავმჯდომარეს შეეფარდა.

სახელმწიფო უსაფრთხოების სამსახურის ანტიკორუფციულმა სააგენტომ ქრთამის აღების ფაქტზე ბორჯომის მუნიციპალიტეტის საკრებულოს თავმჯდომარე და ბორჯომის მუნიციპალიტეტის მერი 29 თებერვალს დააკავა. ამის შესახებ ბრიფინგზე სამმართველოს უფროსმა ბექა ჯიჭონაიამ განაცხადა.

გამოძიება დიდი ოდენობით და განსაკუთრებით დიდი ოდენობით ქრთამის აღებისა და განსაკუთრებით მძიმე დანაშაულის შეუტყობინებლობის ფაქტზე მიმდინარეობს (საქართველოს სსკ-ის 338-ე მუხლის მე-2 ნაწილის „ბ“ და „ე“ ქვეპუნქტებით, რაც სასჯელის სახით 7-დან 11 წლამდე ვადით თავისუფლების აღკვეთას ითვალისწინებს, 338-ე მუხლის მე-3 ნაწილის „ე“ ქვეპუნქტით, რაც სასჯელის სახით 11-დან 15 წლამდე ვადით თავისუფლების აღკვეთას ითვალისწინებს და 376-ე მუხლის მე-3 ნაწილით, რაც სასჯელის სახით 3-დან 7 წლამდე თავისუფლების აღკვეთას ითვალისწინებს).