ცოტნე გამსახურდიას მკვლელობის მცდელობის საქმეზე წინასასამართლო სხდომა ხვალ გაიმართება

ცოტნე გამსახურდიას მკვლელობის მცდელობის საქმეზე წინასასამართლო სხდომა ხვალ გაიმართება, - ამის შესახებ „ქრონიკასთან“ ცოტნე გამსახურდიას ადვოკატმა ისაუბრა.

„სისხლის სამართლის საპროცესო კანონმდებლობის თანახმად, წინასასამართლო სხდომა ბრალდებული პირების მიმართ ხვალ გაიმართება. სხდომაზე მოსამართლე შეაფასებს, არის თუ არა აღნიშნულ საქმეზე საკმარისი მტკიცებულებები, რომლითაც შესაძლებელია გამამტყუნებელი განაჩენის დადგენა. სასამართლო პროცესი იმ პირების მიმართ გაიმართება, ვინც ბრალდებულნი არიან ცოტნე გამსახურდიაზე განხორციელებულ თავდასხმასა და დანაშაულის შეუტყობინებლობაში. საქმეში 5 ადამიანი ფიგურირებს, აქედან 2 - უშუალოდ ბრალდებულის მკვლელობის მცდელობაში“ - აცხადებს ამირან გიგუაშვილი.

ადვოკატის განმარტებით, 11-ტომიან საგამოძიებო მასალებზე დაყრნობით, არსებობს ამომწურავი მტკიცებულებები პირების ბრალეულობის დასამტკიცებლად. ადვოკატის თქმით, საბოლოო მტკიცებულებებიდან დაკავებული პირების ბრალეულობა იკვეთება. ასევე ის არ გამორიცხავს ბრალდებულთა რიცხვის გაზრდას.

„მე, როგორც ცოტნე გამსახურდიას ადვოკატი მიმაჩნია, რომ ამ პირების მიმართ, საქმეში არსებობს სრული და ამომწურავი მტკიცებულებები ბრალეულობის დასადასტურებლად. ველი, რომ ამ საქმეზე გამამტყუნებელი განაჩენი დადგება და აღნიშნული პირები კანონის სრული სიმკაცრით დაისჯებიან. მიმაჩნია, რომ მათი დანაშაულში მონაწილეობის ხარისხი, ის რომ სრულფასოვნად არ თანამშრომლობდნენ გამოძიებასთან, არ მოინანიეს ჩადენილი და მიიმალნენ კიდევ ერთხელ ამტკიცებს მათი საზოგადოებისთვის საშიშ ხასიათსა და გამოკიდებულებას,"- აცხადებს ცოტნე გამსახურდიას უფლებადამცველი.

ცოტნე გამსახურდია 2019 წლის 19 დეკემბერს საკუთარ სახლთან დაჭრეს. მას თავდაპირველად, ხეჩინაშვილის კლინიკაში მკურნალობდნენ, შემდეგ კი თურქეთის კლინიკაში გადაიყვანეს, სადაც ის დღემდე განაგრძობს მკურნალობას. გამსახურდიას დაჭრის ფაქტზე ხუთი პირია დაკავებული.