საკონსტიტუციო სასამართლო მთავრობის წინააღმდეგ „გირჩის“ სარჩელს განიხილავს

კონსტიტუციურია თუ არა საგანგებო მდგომარეობის დროს მარნეულისა და ბოლნისის ჩაკეტვა - საკონსტიტუციო სასამართლო „გირჩის“ სარჩელს მთავრობის წინააღმდეგ განიხილავს. პროცესს ზურაბ ჯაფარიძე ესწრება. საქმეს მეორე კოლეგია განიხილავს.

მოსარჩელე მიიჩნევს, რომ სადავო ნორმა ზღუდავს თავისუფალ გადაადგილებას ისე, რომ ირღვევა საქართველოს კონსტიტუცია. მოსარჩელის განმარტებით, მიმოსვლის თავისუფლებაში ჩარევა დასაშვებია მხოლოდ კანონის საფუძველზე, ხოლო საგანგებო მდგომარეობის დროს, საქართველოს პრეზიდენტის მიერ გამოცემული დეკრეტით. ამ შემთხვევაში, პრეზიდენტის მიერ გამოცემული დეკრეტი არ განსაზღვრავს კონკრეტულ რეგულაციებს.

მოსარჩელის პოზიციით, არ არსებობდა მარნეულისა და ბოლნისის ჩაკეტვის აუცილებლობა, მოსახლეობის ჯანმრთელობის დაცვის მიზნის მიღწევა შესაძლებელი იყო უფლების უფრო ნაკლებად შეზღუდვის ხარჯზეც. კერძოდ, პირბადისა და დამცავი ხელთათმანების გამოყენების გზით.

მოსარჩელე მიიჩნევს, რომ სადავო ნორმა არღვევს საქართველოს კონსტიტუციის მე-14 მუხლის პირველი და მე-2 პუნქტებით განმტკიცებულ მიმოსვლის თავისუფლებას.

მთავრობის წარმომადგენელი ქეთევან კრაწაშვილი მიიჩნევს, რომ გირჩის სარჩელი, რომლითაც პოლიტიკური ორგანიზაცია მარნეულსა და ბოლნისში საკარანტინო რეგულაციების შემოღების არაკონსტიტუციურად ცნობას მოითხოვს, არის დაუსაბუთებელი.

კრაწაშვილი თვლის, რომ მოსარჩელე საგანგებო სიტუაციების დროს მოქმედ საკანონმდებლო რეგულაციებს, კარგად არ იცნობს.

„მოსარჩელის არგუმენტაცია მიუთითებს იმაზე, რომ მოსარჩელე მხარე არ იცნობს სათანადოდ იმ სამართლებრივ არქიტექტურას, რომელიც საგანგებო სიტუაციის დროს მოქმედებს. გარდა ამისა, არ იცნობს დეკრეტის შინაარსს, რომელიც ძალიან კონკრეტულია, შესაბამისი ფარგლებით არის შეზღუდული მთავრობის ყველა მოქმედება, რომელიც მთავრობის მიერ არის განსახორციელებელი, ასევე არ იცნობს შესაბამის კანონმდელობას, რომელიც მხოლოდ დეკრეტით არ სრულდება საგანგებო სიტუაციასთან დაკავშირებით, რაც იმას ნიშნავს, რომ საკონსტიტუციო სარჩელი დაუსაბუთებელია“, - აცხადებს ქეთევან კრაწაშვილი.

„გირჩმა“ საკონსტიტუციო სასამართლოში სამი სარჩელი შეიტანა. სასამართლომ წარმოებაში არ მიიღო ავტომანქანაში სამ პირზე მეტი პირის განთავსების აკრძალვის რეგულაცია, „გირჩის“ მესამე სარჩელი კი კომენდანტის საათის გამოცხადების კონსტიტუციურობას ეხება.