აფგან მუხტარლის მეუღლე თბილისის პოლიციის მთავარ სამმართველოშია

აზერბაიჯანელი ჟურნალისტის აფგან მუხტარლის მეუღლე ლეილა მუსტაფაევა ძველი თბილისის პოლიციის სამმართველოს მთავარ განყოფილებაში მივიდა. მისი თქმით, გუშინ დაუკავშირდნენ და მისვლა სთხოვეს. ,,გამოკითხვისთვის არ მოვსულვარ. გუშინ დამიკავშირდნენ და მთხოვეს რომ მოვსულიყავი. როგორც მითხრეს, უსაფრთხოების ზომებთან დაკავშირებით იქნება საუბარი. ჩემი მოსვლის მიზანიც ეს არის", - განაცხადა მუსტაფაევამ.

მან საქართველოს მოქალაქეობას კიდევ ერთხელ გააკეთა კომენტარი და განაცხადა, რომ ისევ უარს ამბობს მოქალაქეობის მიღებაზე. "აფგან მუხტარლის მდგომარეობა უფრო მნიშვნელოვანია, ვიდრე ჩემი უსაფრთხოება ან ჩემი მოქალაქეობა. მე კარგად არ ვიცნობ ქართულ კანონმდებლობას, მაგრამ თუ ჩემი მეუღლის დახმარება სურთ, მოქალაქეობა მას უნდა შესთავაზონ და არა მე", - დასძინა მუხტარლის მეუღლემ. 

დღეს მუხტარლის ოჯახის ადვოკატმა არჩილ ჩოფიკაშვილმა მთავარ პროკურატურას მიმართა. ჩოფიკაშვილი ითხოვს, რომ ჟურნალისტის საქმე შინაგან საქმეთა სამინისტროს ნაცვლდ მთავარმა პროკურატურამ გამოიძიოს.

აფგან მუხტარლის საქმესთან დაკავშირებით, საქართველოს შსს-მ გამოძიება დაიწყო საქართველოს სსკ-ის 143-ე მუხლით, რაც თავისუფლების უკანონო აღკვეთას გულისხმობს. სახელმწიფო უსაფრთხოების სამსახურის ხელმძღვანელის, ვახტანგ გომელაურის განცხადებით, აზერბაიჯანელი ჟურნალისტი „მწვანე საზღვარზე“ დააკავეს და არა გამშვებ პუნქტზე.

თუმცა, მუხტარლის ახლობლებს, ჟურნალისტების და არასამთავრობო სექტორის ნაწილს არ სჯერა, რომ მისი საქართველოში გაუჩინარება და აზერბაიჯანში გადაყვანა ქართული სპეცსამსახურების დახმარების თუ მათი უმოქმედობის გარეშე მოხდა.