მაკა ასათიანის ადვოკატი: საქმე, რომელიც ქართული მართლმსაჯულების სირცხვილი იყო, კანონიერი გადაწყვეტილებით დასრულდა

საქმე, რომელიც ქართული მართლმსაჯულების სირცხვილი იყო, კანონიერი გადაწყვეტილებით დასრულდა, - ამის შესახებ მაკა ასათიანის ადვოკატმა, გიორგი გვენეტაძემ განაცხადა.

„მე, როგორც იურისტს და უმრავლეს ჩემს კოლეგას ორი აზრი არ გაგვაჩნია, რომ ამ სამართლებრივ დავაში ერთადერთი გადაწყვეტილება უნდა ყოფილიყო, რადგან ხანდაზმულობისა და უსაფუძვლობის გამო დავით ძოწენიძის სარჩელის დაკმაყოფილება უკანონო იქნებოდა. საქმის განხილვის პირველ ეტაპზე, რომელიც 2008 წელს დაიწყო და 2012 წელს დასრულდა, მოხერხდა, მოსარჩელე მხარის და ჩვენი ვარაუდით, მაშინდელი ხელისუფლების გავლენიანი წარმომადგენლის დახმარებით საქმის გადამწყვეტი, ერთ-ერთი მტკიცებულების გაყალბება, რამაც განაპირობა ის, რომ შეუძლებელი აღმოჩნდა მაშინ ასათიანების ოჯახის ინტერესების დაცვა.

2013 წელს დაიწყო გამოძიება მტკიცებულებების ძოწენიძის სასარგებლოდ გაყალბების ფაქტზე. გამოძიებამ 2014 ში მოიპოვა ის მტკიცებულება, რომელიც საქმის ბედზე არსებით გავლენას ახდენდა. ეს არის პარტნიორთა კრების ორიგინალი, რომლის მიხედვითაც ძოწენიძე პარტნიორთა კრებიდან საკუთარი სურვილით, განცხადებით გავიდა შპს “აკას” მერსედესის წარმომადგენლის 20% წილის პარტნიორობიდან”, - განაცხადა ასათიანის ადვოკატმა.

იგი აცხადებს, რომ საქმე, რომელიც ქართული მართლმსაჯულების სირცხვილი იყო, საბოლოოდ, კანონიერი გადაწყვეტილებით დასრულდა.

„სასამართლომ გაუძლო ძოწენის ზეწოლას, მედიით, პარტიების, ოპოზიციური პარტიების, არასამთავრობოების, და მიღებული იქნება ერთადერთი შესაძლებელი გადაწყვეტილება“, - განაცხადა გვენეტაძემ.

მისივე თქმით, ასათიანების ოჯახი „ნაციონალური მოძრაობის” სამიზნე მათი პრინციპულობის გამო გახდა.

„მათვის მიუღებელი იყო დამოუკიდებელი ადამიანების არსებობა. 2012 წელს დასრულდა, თუმცა სასამართლო აღსრულება კი ასათიანის მიმართა განხორციელდა მაშინ, როცა ის „მაესტროს“ წილს ფლობდა და იყო მცდელობა არაპირდაპირი გზით „მაესტროს“ წილი წაეღოთ, რაც საბედნიეროდ ვერ მოახერხეს”, - განაცხადა გვენეტაძემ.

„საქართველოში მერსედეს ბენცის წარმომადგენლობის“ წილების გარშემო მიმდინარე 12-წლიანი პროცესი უზენაეს სასამართლოში მაკა ასათიანის და მისი ოჯახის გამარჯვებით დასრულდა. ამასთან დაკავშირებით, მაკა ასათიანმა დღეს განცხადება გაავრცელა.