მიხეილ რამიშვილი: დღეს ტელეფონი ჩამომართვეს და ხვალ შესაძლოა დამაკავონ

გარდაცვლილი 23 წლის პროგრამისტის თამარ ბაჩალიაშვილის ოჯახის ადვოკატი მიხეილ რამიშვილი მის დაკავებას არ გამორიცხავს. ამის შესახებ მან ჟურნალისტებს პროკურატურიდან გამოსვლისას განუცხადა.

„ჩემი მობილური ტელეფონი დალუქეს. დღეს ტელეფონს ჩამომართმევენ და ხვალ ალბათ თავისუფლებასაც მიაყოლებენ“, - განაცხადა რამიშვილმა.

მისი თქმით, გამოძიებას არ სურს, რომ ის ამ საქმეში ფიგურირებდეს: „არ უნდათ ამ საქმეში ვიყო. ვაწვდი ინფორმაციას, რომ ეს გოგო არის მოკლული. ჩემს ტელეფონში ვერაფერს იპოვიან ოფიციალურად. არაოფიციალურად ყველაფერს შექმნიან“, - აღნიშნა რამიშვილმა.

მან ასევე ჟურნალისტებს განუცხადა, რომ გამოძიებას თამარ ბაჩალიაშვილის საქმეზე ახალი ინფორმაცია მიაწოდა. „ჩემს მიერ იქნა წარდგენილი გამოკითხვის ოქმი, სადაც სუს-ის ყოფილი თანამშრომელი ადასტურებს რომ ჰქონდა შემხებლობა თამარ ბაჩალიაშვილთან. რომ გარკვეულ ინფორმაციას აწვდიდნენ და დანარჩენზე ვნახავთ რა საგამოძიებო მოქმედებას განახორციელებს პროკურატურა“, - აღნიშნა რამიშვილმა. .

რაც შეეხება მის მიერ გამოძიებისთვის სატელიტური ფოტოს მიწოდების საკითხს, მიხეილ რამიშვილის განცხადებით, ის გამოძიების კითხვებზე პასუხს გასცემს და ჩვენებას მხოლოდ მაგისტრ მოსამართლეს მისცემს.

მიხეილ რამიშვილის მიერ წარმოდგენილ ფოტოსურათებზე ჩატარდა ექსპერტიზა და ცალსახად დადგინდა, რომ ეს არის მონტაჟის შედეგად შექმნილი ყალბი მტკიცებულება, რომელიც მიზნად ისახავდა საზოგადოების და საგამოძიებო უწყების შეცდომაში შეყვანას. ამის შესახებ გენერალურ პროკურატურაში 18 სექტემბერს გამართულ ბრიფინგზე პროკურორმა, ამირან გულუაშვილმა განაცხადა.

ადვოკატი მიხეილ რამიშვილი ამტკიცებდა, რომ ეს ფოტოები 2020 წლის 19 ივლისს სატელიტით იყო გადაღებული და ამ ფოტოებში თამარ ბაჩალიაშვილის ავტომობილი არ ჩანდა.

პროკურატურის განცხადებით, თამარ ბაჩალიაშვილის ცხედარს მექანიკური დაზიანების რაიმე ნიშნები, მათ შორის ინექციის კვალი არ აღენიშნება. უწყებაში გამართულ ბრიფინგზე განაცხადეს, რომ თამარ ბაჩალიაშვილის გარდაცვალების მიზეზი მედიკამენტოზური ინტოქსიკაცია უნდა იყოს.

თამარ ბაჩალიაშვილი თეთრიწყაროს ტყეში გარდაცვლილი 22 ივლისს იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.

თბილისში, ქვემო ფონიჭალაში მცხოვრები თამარ ბაჩალიაშვილი ვიდეოკამერებმა ბოლოს სოფელ ხაიშთან დააფიქსირეს. გოგო ნაცრისფერი ჰუნდაის მარკის მანქანით გადაადგილდებოდა.