პროკურორი: მიხეილ რამიშვილის ტელეფონი მისი თანხმობით დაილუქა

გარდაცვლილი 23 წლის პროგრამისტის ადვოკატის მიხეილ რამიშვილისთვის ტელეფონის ჩამორთმევის შესახებ, პროკურორმა დავით გუმბერიძემ განმარტება გააკეთა.

„საქალაქო სასამართლოს მოსამართლის განჩინების საფუძველზე, ჩატარდა მიხეილ რამიშვილის კუთვნილი ტელეფონიდან ინფორმაციის გამოთხოვა. რაც დაკავშირებული იყო დავით ფურცხვანიძესთან, მასთან კომუნიკაციის ამსახველ ინფორმაციასა და სატელიტურ ფოტოებთან დაკავშირებით“, - ამის შესახებ ჟურნალისტებს პროკურორმა, დავით გუმბერიძემ განუცხადა.

მისი თქმით, ინფორმაციის გამოთხოვის დროს, რასაც აწარმოებდა გამომძიებელი, მიხეილ რამიშვილის ტელეფონში აღმოჩნდა მნიშვნელოვანი ინფორმაცია დავით ფურცხვანიძესთან კომუნიკაციის ნაწილში და სატელიტურ ფოტოებთან დაკავშირებით, რაც თავის დროზე ადვოკატმა გამოძიებას წარუდგინა.

„შესაბამისად ის ინფორმაცია, რაც ფიქსირდება მიხეილ რამიშვილის ტელეფონში, წარმოადგენს საქმისთვის მნიშვნელოვან გარემოებას. იმისთვის რომ შემდგომ საეჭვო არ იყოს აუთენტურობა, წარმომავლობა ან ამ დოკუმენტის კონკრეტული შემხებლობა საქმესთან, ჩვენ შევთავაზეთ მიხეილ რამიშვილს უშუალოდ ექსპერტის, სპეციალისტის მონაწილეობით, მომხდარიყო ამ კონკრეტული ინფორმაციის გადმოტანა და საქმეზე დამაგრება. შესაბამისად, მისი თანხმობით მოხდა ამ ტელეფონის დალუქვა.

შემდეგ მიხეილ რამიშვილმა განაცხადა რომ ოჯახის წევრი ჰყავდა ცუდად და ნახევარი საათით უნდა გასულიყო, მისი თანხმობით დალუქული ტელეფონი დარჩა თბილისის პროკურატურის საგამოძიებო ნაწილში. დაბრუნდება ადვოკატი და გამომძიებლებთან ერთად წავლენ ლევან სამხარაულის სახელობის ექსპერტიზის ბიუროში და მოხდება უშუალოდ ექსპერტის მონაწილეობით საქმეზე არსებული მნიშვნელოვანი ინფორმაციის გადმოტანა.

ეს არის საკმაოდ მნიშვნელოვანი ამ კონკრეტული საქმის შესწავლის ნაწილში და შესაბამისად, ეს დოკუმენტი დამაგრდება საქმეზე უშუალოდ მიხეილ რამიშვილის მონაწილეობით“, - განაცხადა პროკურორმა.

კითხვაზე მიხეილ რამიშვილის შესაძლო დაკავებასთან დაკავშირებით, პროკურორმა ჟურნალისტებს ასე უპასუხა. „თუ რა გადაწყვეტილებას მიიღებს საგამოძიებო ორგანო მტკიცებულებების ფალსიფიკაციასთან დაკავშირებით, ამას საზოგადოება ძალიან მალე გაიგებს. მალე მიიღებს გადაწყვეტილებას პროკურატურა საქმეში სატელიტური ფოტოების წარდგენის საკითხზე. ჩვენ ექსპერტიზით დადასტურებული გვაქვს რომ ეს ფოტოები დამზადებულია მონტაჟის შედეგად და შეიცავს ცრუ ინფორმაციას“, - აღნიშნა დავით გუმბერიძემ.

რაც შეეხება დავით ფურცხვანიძეს, პროკურორის განცხადებით, ის თავად არაა ჩამოყალიბებული რამდენად სწორ ინფორმაციას შეიცავს ეს ფოტოები. „მან გააჟღერა კომენტარის სახით, რომ თვითონაც აპირებს ალტერნატიული ექსპერტიზის დანიშვნას. მან დაკითხვის დროს ვერ დაასახელა კონკრეტული წყარო რომ ეს ფოტოები შეიცავდა ნამდვილ ინფორმაციას. რა თქმა უნდა ჩვენ შევისწავლით იმ ინფორმაციას რაც ფურცხვანიძემ დაკითხვისას განაცხადა და შესაბამისად ამაზე მოვახდენთ რეაგირებას.

მტკიცებულებების ფალსიფიკაციის ნაწილში ჩვენს მიერ ტარდება ყველა საგამოძიებო მოქმედება და საზოგადოება მალე გაიგებს თუ რა გადაწყვეტილებას მიიღებს საქართველოს პროკურატურა კონკრეტულად ამ ფაქტთან მიმართებაში. იმ შემთხვევაში თუ ჩატარებული გამოძიებით დადგინდა მტკიცებულების ფალსიფიკაციის ფაქტი გარკვეული პირების მიმართ ჩვენ მივიღებთ სამართლებრივ გადაწყვეტილებას“, - განაცხადა დავით გუმბერიძემ.

გარდაცვლილი 23 წლის პროგრამისტის თამარ ბაჩალიაშვილის ოჯახის ადვოკატი მიხეილ რამიშვილი მის შესაძლო დაკავებას არ გამორიცხავს.

მიხეილ რამიშვილის მიერ წარმოდგენილ ფოტოსურათებზე ჩატარდა ექსპერტიზა და ცალსახად დადგინდა, რომ ეს არის მონტაჟის შედეგად შექმნილი ყალბი მტკიცებულება, რომელიც მიზნად ისახავდა საზოგადოების და საგამოძიებო უწყების შეცდომაში შეყვანას. ამის შესახებ გენერალურ პროკურატურაში 18 სექტემბერს გამართულ ბრიფინგზე პროკურორმა, ამირან გულუაშვილმა განაცხადა.

ადვოკატი მიხეილ რამიშვილი ამტკიცებდა, რომ ეს ფოტოები 2020 წლის 19 ივლისს სატელიტით იყო გადაღებული და ამ ფოტოებში თამარ ბაჩალიაშვილის ავტომობილი არ ჩანდა.

პროკურატურის განცხადებით, თამარ ბაჩალიაშვილის ცხედარს მექანიკური დაზიანების რაიმე ნიშნები, მათ შორის ინექციის კვალი არ აღენიშნება. უწყებაში გამართულ ბრიფინგზე განაცხადეს, რომ თამარ ბაჩალიაშვილის გარდაცვალების მიზეზი მედიკამენტოზური ინტოქსიკაცია უნდა იყოს.

თამარ ბაჩალიაშვილი თეთრიწყაროს ტყეში გარდაცვლილი 22 ივლისს იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.

თბილისში, ქვემო ფონიჭალაში მცხოვრები თამარ ბაჩალიაშვილი ვიდეოკამერებმა ბოლოს სოფელ ხაიშთან დააფიქსირეს. გოგო ნაცრისფერი ჰუნდაის მარკის მანქანით გადაადგილდებოდა.