გიორგი შაქარაშვილის საქმეზე სასამართლოში ფოტოგრაფი იაკობ ბრეგვაძე იკითხება

მცხეთის რაიონულ სასამართლოში გიორგი შაქარაშვილისთვის საქმეზე, ძალადობისთვის, ძალადობის ორგანიზების და თავისუფლების უკანონოდ აღკვეთის ბრალდებით დაკავებული 6 არასრულწლოვნის საქმის არსებითი განხილვა გრძელდება.

დღევანდელ პროცესზე ბრალდების ე.წ. ოქროს მოწმე, ფოტოგრაფი იაკობ ბრეგვაძე იკითხება. მისი ადვოკატის განმარტებით ის ყველა დეტალზე ისაუბრებს. ირმა ჭკადუას თქმით ბრეგვაძემ არ იცის კონკრეტული პირები შესაბამისად ვერავის ამოიცნობს, იცის მხოლოდ მათი რაოდენობა რადგან ბნელოდა.

„იაკობმა რაც იცოდა ყველა იმ ფაქტის შესახებ, რაც იმ საღამოს განვითარდა, ამომწურავი ინფორმაცია მიაწოდა, როგორც საგამოძიებო ორგანოებს, ასევე მასმედიის წარმომადგენლებს. მერწმუნეთ, იაკობს დასამალი არაფერი აქვს, კონკრეტული პირების იდენტიფიცირება არ შეუძლია, მან უბრალოდ ადამიანების რაოდენობა იცის, დანარჩენს პროცესის შემდეგ მოგახსენებთ. რა კითხვები იქნება არ ვიცი, იაკობ ბრეგვაძე მზად არის, ყველა კითხვას უპასუხოს. ყველა დანარჩენი სტუმარი მანქანით წავიდა, სრულიად შემთხვევით, 6 ადამიანი დარჩა მანქანის გარეშე, ყველა ერთად მოდიოდა თბილისში. მათი სახელებიც კი მაშინ არ იცოდა, იცოდა ჩაცმულობით. რაც შეეხებათ შემდეგ მოსულ ადამიანებს, მან ისინი სახეზე არ იცის, ვიცით რომ იყო სიბნელე. მას უფრო კარგად ახსოვს ის ორი ადამიანი, ვინც მაგისტრალზე წამოეწია და ნომრები გაცვალეს მისთვის უცნობმა ადამიანებმა. იაკობმა იფიქრა, რომ როგორც მან უშველა თავს, ისე უშველეს დანარჩენებმაც, რაზეც იაკობი საუბრობს, კადრები არსებობს. ვთქვათ, იაკობ ბრეგვაძე ცრუობს, რას ვუშვრებით იმ კადრებს? როცა იაკობი გამოდის იმ სახლიდან და გადადის მეორე მხარეს, აბსოლუტურად არაფერი ხდება. შესაბამისად, მან იფიქრა, რომ სხვებმაც თავს უშველეს. სანამ პატრული მოვიდოდა, იქამდე რომ ურეკავენ, იქაც ეუბნება, აზრი აღარ აქვს, კონფლიქტი ამოწურულია და ნუ მოხვალთო“, - განაცხადა ჭკადუამ.

საქმის პროკურორი მიიჩნევს, რომ დაზარალებულ იაკობ ბრეგვაძის ჩვენება ექვსივე პირთან მიმართებაში მამხილებელი იქნება.

„აღნიშნული მოწმე გამოკითხულია გამოძიებაში, მასთან ჩატარებულია საგამოძიებო ექსპერიმენტი. შესაბამისად, იმ ინფორმაციის ირგვლივ, რასაც გამოძიებაში აწვდიდა, ბრალდების მხარეს გვექნება შეკითხვები.
მოლოდინი გვაქვს, რომ იაკობ ბრეგვაძის ჩვენება მამხილებელი იქნება ბრალდებულებთან მიმართებაში. დღეს მოგეხსენებათ კანონთან კონფლიქტში მყოფი 6 პირის პროცესი იმართება. მოლოდინი გვაქვს, რომ ექვსივე პირთან მიმართებაში იაკობ ბრეგვაძის ჩვენება მამხილებელი იქნება. მასთან გამოძიების პროცესში ამოცნობა არ არის ჩატარებული იქიდან გამომდინარე, რომ მას კონკრეტული პიროვნებების სახის მოყვანილობის, ინდივიდუალური ნიშან-თვისებები მითითებული არ ჰქონდა. თუმცა, ფაქტობრივ გარემოებებს - თავდასხმას, მის განხორციელებას, ორივე ავტომობილის მოსვლას და პირების რაოდენობას, იქ განვითარებულ მოვლენებს
მოწმე გამოძიებაში გამოკითხვის დროს ადასტურებდა. დღევანდელ პროცესზე ასევე იგეგმება გამოკვლეული იქნას ვიდეომასალა და წერილობითი მტკიცებულებები“, - განაცხადა გუგუტიშვილმა.

19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.