ვახტანგ გომელაური: პირველი ამოცანა ადამიანების გადარჩენა იყო, მეორე ეტაპია ეს ადამიანი დავიჭიროთ და დავსაჯოთ

პირველი ამოცანა ადამიანების გადარჩენა იყო, 43 მძევალი გავათავისუფლეთ და არც ერთი მათგანი არ არის დაშავებული. მეორე ეტაპია ეს ადამიანი დავიჭიროთ და დავსაჯოთ, - ამის შესახებ შინაგან საქმეთა მინისტრმა, ვახტანგ გომელაურმა ჟურნალისტებს განუცხადა.

მისი თქმით, ძალიან ბევრი ვერსია გავრცელდა და გამოძიება ყველა მიმართულებით მუშაობს.

„ძალიან ბევრი ვერსია გავრცელდა, თუმცა ამას ვერც დავადასტურებ და ვერც უარვყოფ, გამოძიება ყველა მიმართულებით მუშაობს. რაც შეეხება თანამზრახველთა საკითხს, შესაძლოა, იმ 43 მძევალში 10 ადამიანი იყო მისი თანამზრახველი, ვერავინ ვერ იტყვის ამას, იყო თუ არა. გამოძიება მიმდინარეობს, არ შეიძლება წინასწარ დააბრალო ადამიანებს რაღაც მტკიცებით ფორმაში. აქედან გამომდინარე, ამაზე კომენტარს ვერ გავაკეთებ“, - განაცხადა ვახტანგ გომელაურმა.

ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ შეიარაღებულმა პირმა მძევლები 21 ოქტომბერს აიყვანა. თავდამსხმელი შენობიდან 3 მძევალთან ერთად გამოვიდა. როგორც კადრებში გამოჩნდა, მას შენობის დატოვების დროს ერთი ხელი აწეული ჰქონდა და სავარაუდოდ ხელში ხელყუმბარა ეკავა.

22 ოქტომბერს, გამთენიისას შსს-მ გაავრცელა განცხადება, რომლის თანახმად, ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა და მათ სიცოცხლეს და ჯანმრთელობას საფრთხე არ ემუქრება. ხოლო დამნაშავის დაკავების მიზნით სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს.