როგორ მივიდა თავდამსხმელი ზუგდიდის „საქართველოს ბანკის“ ფილიალამდე

„საქართველოს ბანკის“ ზუგდიდის ფილიალზე თავდამსხმელი ბანკის შენობამდე, ახალსოფლიდან მივიდა.

ახალსოფლისა და ზუგდიდის დამაკავშირებელ ხიდთან ის შინაგან საქმეთა სამინისტროს თანამშრომელს, დავით მატუას დახვდა და იარაღის მუქარით მოსთხოვა ქალაქამდე გასვლა.

როგორც მატუას ძმა იხსენებს, დავით მატუა სახლიდან დაახლოებით 14 საათისთვის გავიდა. ის მანქანაში მარტო იყო და სხვა მეგობრებთან ერთად მეგობრის საფლავზე აპირებდა გასვლას. მისივე ინფორმაციით, დავით მატუამ როგორც კი თავდამსხმელი ბანკის შესასვლელთან ჩამოსვა, 112-ში დარეკა და ხელმძღვანელობას დაუკავშირდა.

ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ შეიარაღებულმა პირმა მძევლები 21 ოქტომბერს აიყვანა.

თავდამსხმელი შენობიდან 3 მძევალთან ერთად გამოვიდა. როგორც კადრებში გამოჩნდა, მას შენობის დატოვების დროს ერთი ხელი აწეული ჰქონდა და სავარაუდოდ ხელში ხელყუმბარა ეკავა.

22 ოქტომბერს, გამთენიისას შსს-მ გაავრცელა განცხადება, რომლის თანახმად, ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა და მათ სიცოცხლეს და ჯანმრთელობას საფრთხე არ ემუქრება. ხოლო დამნაშავის დაკავების მიზნით სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს.