პროკურატურამ კორტების საქმეზე სააპელაციოს გადაწყვეტილება შესაძლოა უზენაესში გაასაჩივროს

კორტების საქმის პროკურორის, ამირან გულუაშვილის განცხადებით, სააპელაციო სასამართლოს მიერ დღეს მიღებული გადაწყვეტილება მთავარმა პროკურატურამ შესაძლოა უზენაეს სასამართლოში გაასაჩივროს.

ამის მიზეზი პირველი ინსტანციის სასამართლოს მიერ მსჯავრდებულების რამდენიმე ბრალდებაში გამართლებაა. 

"სააპელაციო სასამართლოში, როგორც განაჩენიდან ირკვევა, არ იქნა გაზიარებული ჩვენს მიერ წარმოდგენილი არგუმენტები. ბუნებრივია, დღევანდელ სასამართლო სხდომაზე, მოსამართლე ზეპირ დასაბუთებას არ ახდენს, გადაწყვეტილების მხოლოდ სარეზოლუციო ნაწილი იქნა გამოცხადებული, შესაბამისად, ჩვენთვის უცნობია, თუ რა შეფასებებზე და არგუმენტებზე დაყრდნობით არ გაიზიარა სასამართლომ ჩვენი პოზიცია, გამამართლებელი განაჩენის შეცვლის ნაწილში. განაჩენის გაანალიზების შედეგად, მივიღებთ გადაწყვეტილებას, უზენაეს სასმართლოში  გასაჩივრების შესახებ", - განაცხადა ამირან გულუაშვილმა.

მთავარმა პროკურატურამ სააპელაციოს დღევანდელი გადაწყვეტილების შესახებ ოფიციალური განცხადება გაავრცელა.

"პროკურატურის მიერ საქმეზე შეკრებილი და გამოკვლეული მტკიცებულებებით კიდევ ერთხელ უტყუარად დადასტურდა, რომ 2006 წლის 2 მაისს, ე.წ „კორტების სპეცოპერაციისას“ მოკლული ზურაბ ვაზაგაშვილისა  და ალექსანდრე ხუბულოვის საქმეზე მსჯავრდებულმა პირებმა ჩაიდინეს ჯგუფურად, ორი ან მეტი პირის განზრახ მკვლელობა ისეთი საშუალებით, რაც განზრახ უქმნის საფრთხეს სხვათა სიცოცხლესა და ჯანმრთელობას, ასევე მტკიცებულებათა ფალსიფიკაცია, რასაც მძიმე შედეგი მოჰყვა და განზრახ უკანონო დაკავება", - წერია განცხადებაში. 

კორტების სპეცოპერაციის საქმეზე სააპელაციო სასამართლოს განაჩენის უზენაეს სასამართლოში გასაჩივრებას აპირებენ ბრალდებულების ადვოკატებიც. ბრალდებულთა ადვოკატის მალხაზ ველიჯანაშვილის განცხადებით, სავარაუდოდ, უზენაესი სასამართლოც სააპელაციოს მსგავს გადაწყვეტილებას მიიღებს, ამიტომ საბოლოოდ საქმეს ევროპულ სასამართლოში გაასაჩივრებენ.

თბილისის სააპელაციო სასამართლომ, ე.წ. კორტების საქმეზე დაკავებულთა განაჩენი უცვლელად დატოვა. საქალაქო სასამართლომ გიორგი ცააძესა და ირაკლი ფირცხალავას განზრახ მკვლელობისთვის 12-12 წლით თავისუფლების აღკვეთა მიუსაჯა.

გიორგი ცააძესა და ირაკლი ფირცხალავას 2006 წლის მაისში კორტების მიმდებარედ ზურაბ ვაზაგაშვილის და ალექსანდრე ხუბულოვის მკვლელობას და მკვლელობის ორგანიზებას ედავებიან.

2006 წელს, კორტების სპეცოპერაციისას 4 ადამიანი გარდაიცვალა, მათ შორის ზურაბ ვაზაგაშვილიც.