პროკურორი დავით გარეჯის საქმეზე: დაცვის მხარემ წარმოადგინა ერთი ინჟინრის ტექსტი, რომელიც ვერანაირ კრიტიკას ვერ უძლებს

დასკვნა, რომელიც შესრულებულია დაცვის მხარის დაკვეთით, ფაქტობრივად, არის პირველი და ამ ეტაპისთვის, ერთადერთი მტკიცებულება, რომელიც დაცვის მხარემ, ანუ ადვოკატებმა და ბრალდებულებმა წარმოადგინეს. არც საგამოძიებო უწყებისთვის, არც საზოგადოებისთვის არ მომხდარა მათი პოზიციის დამადასტურებელი მტკიცებულების, დოკუმენტის ან ინფორმაციის წარმოდგენა, იმისთვის, რომ საზოგადოება და სახელმწიფო ბრალდება დარწმუნებულიყო მათი გარკვეული ლოგიკების სისწორეში, - ამის შესახებ ტელეკომპანია „იმედის“ გადაცემაში „არენა“ პროკურორმა, ამირან გულუაშვილმა განაცხადა.

„რაც შეეხება თავად ექსპერტიზის დასკვნას; უნდა აღინიშნოს, რომ ნებისმიერ ადამიანს შეუძლია, მოამზადოს ნებისმიერი ტექსტი, აკრიფოს კომპიუტერში, დაასათაუროს ექსპერტიზის დასკვნით და ბუნებრივია, მხოლოდ ამის გამო, ეს დოკუმენტი ვერ შეიძენს ექსპერტიზის დასკვნის ავტორიტეტსა და იურიდიულ ძალას. სამართლებრივ სივრცეში გარკვეული საგამოძიებო, საპროცესო მოქმედებები, მათ შორის, საექსპერტო კვლევები შეფასების საკითხია და საბოლოო ჯამში, შეფასებებს სასამართლო აკეთებს. თვალსაჩინოებისთვის რომ წარმოვიდგინოთ, რასთან გვაქვს საქმე, ანუ რას უპირისპირებს დაცვის მხარე ამ ე.წ. „ექსპერტიზის დასკვნას“ - გამოძიების საწყის ეტაპზევე, ჩვენ დავნიშნეთ კარტოგრაფიული ექსპერტიზები, რომელიც გულისხმობს ქვეყანაში მოწინავე სპეციალისტების, ექსპერტების, თსუ-ს პროფესორების, აკადემიკოსების ჩართულობას კვლევებში და ამ ადამიანების მიერ, კვირების განმავლობაში ხდება საექსპერტო კვლევების განხორციელება ერთობლივად. დაცვის მხარემ ამ პროცესს დაუპირისპირა, როგორც ექსპერტიზის დასკვნიდან ირკვევა, ერთი ინჟინრის ტექსტი, რომელიც, როგორც ირკვევა, არც ტექნიკური და არც შინაარსობრივი თვალსაზრისით, არ აკმაყოფილებს არანაირ მოთხოვნას და ვერ უძლებს ვერანაირ კრიტიკას. სავარაუდოდ, ის დამზადებულია შაბლონის გამოყენებით, რადგან დამკვეთმა ექსპერტიზის წინაშე განსაზღვრა სამი შეკითხვა, ხოლო პასუხი გაცემულია მეოთხე კითხვაზეც, რომელიც ფიზიკურად არ არსებობს ბუნებაში. ექსპერტიზის დასკვნაში საერთოდ არაა აღწერილი, რა მეთოდოლოგია გამოიყენა პირმა კვლევის ჩატარებისას, საერთოდ არაა მითითებული, რა ლიტერატურა გამოიყენა ამ საექსპერტო საკითხზე მუშაობისას, არაა დაკონკრეტებული კონკრეტული გარემოებები, მაგალითად, რომელი კარტოგრაფიული მასალა რომელს შედარდა და ა.შ. ამ დოკუმენტის შინაარსობრივი მხარე ვერანაირ კრიტიკას ვერ უძლებს“ - განაცხადა პროკურორმა.

დაკავებულთა ადვოკატებმა სხდომაზე იმ 214-ი ადამიანის ხელმოწერა შეაგროვეს, რომლებიც ბრალდებულებს თავდებად დაუდგნენ, მათ შორის იყვნენ ოპოზიციონერი პოლიტიკოსები და მოძრაობა „სირცხვილიას“ წევრები, რომლებმაც სხდომის პარალელურად, სასამართლოს ეზოში აქცია გამართეს.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.