გურამ რჩეულიშვილი ცენტრ პოინტის დაზარალებულებს ბინებით დაკმაყოფილებას 24 თვის ვადაში დაჰპირდა

თბილისის საქალაქო სასამართლომ "ცენტრ პოინტის" საქმის მაგნოლიას ეპიზოდი განიხილა. დაიკითხა დაცვის მხარის ერთი მოწმე, ზურა ხიზნიშვილი, რომელიც ერთ-ერთი თანამენაშენეა. დაზარალებულებს პროცესზე გურამ რჩეულიშვილიც შეხვდა და მათ ბინებით დაკმაყოფილებას 24 თვის ვადაში დაჰპირდა.

დღესვე, სასამართლომ "ცენტრ პოინტის" საქმის კიდევ ერთი ეპიზოდის ,,დიღომი დისთრიქთ აფართამენთის" საქმე განიხილა. პროკურატურის ვერსიით, "ცენტრ პოინტ ჯგუფის“ დამფუძნებელმა და დირექტორმა მაია რჩეულიშვილმა, ასევე „დიღომი დისთრიქთ აფართმენთის“ საორგანიზაციო განყოფილების ყოფილმა უფროსმა ქეთევან ჟორდანიამ სისხლის სამართლის დანაშაული ჩაიდინეს. ამ ეტაპზე ბრალდების მხარემ წერილობითი მტკიცებულებები წარადგინა, შემდეგ პროცესზე დაიკითხებიან მოწმეები, რითაც დაასრულებს საკუთარი მტკიცებულებების გამოკვლევას. დაცვის მხარემ კომენტარის გაკეთებისგან თავი შეიკავა.

,,დიღომი დისთრიქთ აფართამენთის" საქმეზე პროკურატურამ მაია რჩეულიშვილი და ქეთევან ჟორდანია პასუხისგებაში 2017 წლის 15 თებერვალს მისცა. ჩატარებული გამოძიებით დადგინდა, რომ 2014 წლის ბოლოს, შპს „დიღომი დისთრიქთ აფართმენთის“ დირექტორი მაია რჩეულიშვილი, მენაშენეთა კუთვნილი დიდი ოდენობით თანხების მოტყუებით დასაუფლებლად, შეუთანხმდა ამავე საზოგადოების საორგანიზაციო განყოფილების უფროსს - ქეთევან ჟორდანიას, რათა ეს უკანასკნელი დაკავშირებოდა შპს „დიღომი დისთრიქთ აფართმენთის“ მშენებარე ობიექტების მენაშენეებს და იმ მოტივით, თითქოს მათი ქონების საჯარო რეესტრში რეგისტრაციისთვის და მშენებარე ობიექტზე კომუნიკაციების შესაყვანად საჭირო იყო დამატებითი თანხების მობილიზაცია, მოეთხოვა თითოეული მათგანისთვის 1 870 ლარის გადახდა. მ. რჩეულიშვილის დავალების შესაბამისად, ქ. ჟორდანია დაუკავშირდა ობიექტის მენაშენეებს, მოსთხოვა მათ და 2014-2016 წლების განმავლობაში შეატანინა ჯამში 258 092 ლარი, საიდანაც მიზნობრიობით, საჯარო რეესტრში რეგისტრაციისთვის გადაირიცხა მხოლოდ 21 915 ლარი, ხოლო დარჩენილ თანხას - 236 177 ლარს ქეთევან ჟორდანიას დახმარებით დაეუფლა მაია რჩეულიშვილი.

მაია რჩეულიშვილის და ქეთევან ჟორდანიასთვის წარდგენილი ბრალდება სასჯელის სახედ ითვალისწინებს თავისუფლების აღკვეთას ექვსიდან ცხრა წლამდე ვადით.

მაია რჩეულიშვილს და რუსუდან კერვალიშვილს თბილისის საქალაქო სასამართლომ 4-4-წლიანი პატიმრობა 31 მარტს მიუსაჯა. პროკურატურა "ცენტრ პოინტის" დამფუძნებლებს თაღლითობას და თანხების მითვისებას ედავებოდა.

გურამ რჩეულიშვილი 30 000-ლარიანი გირაოთი 6 აპრილს გაათავისუფლეს.