ხუციშვილი პარლამენტისა და ფოთის პორტის IT სისტემებზე კიბერშეტევის შესახებ განმარტებებს აკეთებს

შინაგან საქმეთა მინისტრის მოადგილე შალვა ხუციშვილი პარლამენტისა და ფოთის პორტის ერთ-ერთ ტერმინალზე კომპიუტერული ვირუსის Petya-ს შემოტევის შესახებ განმარტებებს აკეთებს.

ხუციშვილის თქმით, კიბერთავდასხმა ფოთის პორტზე კი არა, პორტში მომუშავე ერთ-ერთ უცხოურ საერთაშორისო კომპანიაზე განხორციელდა. ამ კიბერშეტევის საქმეს კი იმ ქვეყნის სამსახურები იძიებენ, სადაც კომპანიის სათავო ოფისი მდებარეობს.

"ჩვენთან მხოლოდ მისი წარმომადგენლობაა. პარლამენტთან დაკავშირებით ოფიციალური შეტყობინება შემოსული არ ყოფილა. თუმცა, საჯაროდ გავრცელებულ ინფორმაციაზე დაყრდნობით, ჩვენი სპეციალისტები დაუკავშირდნენ პარლამენტის შესაბამისს სამსახურს. ამჟამად ვითარებაში ერკვევიან და ამის შემდეგ გადაწყდება, თუ რასთან გვაქვს საქმე. სისხლის სამართლის გამოძიება დაწყებული ამ ეტაპზე არ არის", - განაცხადა შალვა ხუციშვილმა.

ევროპის ქვეყნები და აშშ-ის რამდენიმე შტატი კიდევ ერთი კომპიუტერული ვირუსის კიბერშეტევის მსხვერპლნი გახდნენ. ვირუსმა Petya-მ ესტონეთის, პოლონეთის, უკრაინის, საფრანგეთის, დანიის, რუსეთისა და პენსილვანიის შტატში კომპიუტერულ სისტემებში შეაღწია და გათიშა. 

გუშინ გავრცელდა ინფორმაცია, რომ კომპიუტერულმა ვირუსმა ფოთის პორტის ,,მაერსკ ჯგუფის“ IT სისტემებზეც შემოაღწია, რის გამოც  სისტემა სრულად გაითიშა ,,მაერსკ ჯგუფში“ შემავალ კომპანიებში, მათ შორის ,,ეიპიემ ტერმინალს ფოთში“.

დღეს კი ცნობილი გახდა, რომ ვირუსმა Petya-მ საქართველოს პარლამენტის IT სისტემას პრობლემები შეუქმნა. ვირუსის გამო დაიბლოკა პარლამენტარების სამსახურებრივი ელექტრონული ფოსტის მისამართები. დეპუტატები რამდენიმე დღე ელფოსტებს ვერ ამოწმებდნენ, თუმცა როგორც პარლამენტის პრესსამსახურმა imedinews-სთან განაცხადა, პრობლემა აღმოფხვრილია.