მიხეილ სადრაძე დავით გარეჯის საქმეზე: ბრალდებულები ადასტურებენ, რომ 200 ათასიანი, ერთ-ერთი ყველაზე რელევანტური რუკა მათ ჰქონდათ

ბრალდებულები, ვიდრე მათი დაკავება მოხდებოდა, არაერთხელ გამოიკითხნენ საგამოძიებო ორგანოს მიერ და ისინი ადასტურებენ, რომ 200 ათასიანი, ერთ-ერთი ყველაზე რელევანტური რუკა მათ ჰქონდათ და ჰქონდათ 90-იან წლებში, - ამის შესახებ ტელეკომპანია „იმედის“ გადაცემაში „დღის ქრონიკა“ დავით გარეჯის საქმის პროკურორმა, მიხეილ სადრაძემ განაცხადა.

მისი თქმით, ერთ-ერთი ბრალდებულის სამუშაო ოთახში დედნის სახით მოიპოვეს 200 ათასიანი რუკა.

„ბრალდებულები, ვიდრე მათი დაკავება მოხდებოდა, არაერთხელ გამოიკითხნენ საგამოძიებო ორგანოს მიერ და ისინი ადასტურებენ, რომ 200 ათასიანი, ერთ-ერთი ყველაზე რელევანტური რუკა მათ ჰქონდათ და ჰქონდათ 90-იან წლებში. შესაბამისად, ისინი თავად ადასტურებენ, რომ მათ ეს მასალა ჰქონდათ. ასევე არსებობს მტკიცებულებები. საგამოძიებო მოქმედებების შედეგად ჩვენ მათ სახლებში, სამუშაო ოთახებში ჩავატარეთ ჩხრეკა, ამოვიღეთ მასალები და ეს რუკები დედნის სახით მოვიპოვეთ. ერთ-ერთი ბრალდებულის სამუშაო ოთახში დედნის სახით მოვიპოვეთ რუკა, რომელიც კანონის თანახმად არა კონკრეტული პირის პირის კაბინეტში, არამედ არქივში უნდა ინახებოდეს, რადგან ის საქართველოს სახელმწიფოს საკუთრებაა. ასევე, ჩვენ მოვიპოვეთ უამრავი ელექტრონული ინფორმაცია, კომპიუტერები მათ შორის, სადაც ელექტრონული ვერსია ასეთი რუკების არსებობს. ასევე არსებობს უამრავი მოწმის ჩვენება და რაც მთავარია, არსებობს დოკუმენტები იმისა, რომ ბრალდებულებს ყველა რელევანტური მასალა თავის დროზე ჰქონდათ, ისინი მათ გაანალიზეს, თუმცა განზრახ არ გამოიყენეს და იგნორირება მოახდინეს. შესაბამისად, მსგავსი განცხადებები ფაქტებთან ძალიან დიდ წინააღმდეგობაში მოდის. ერთ-ერთი ​ბრალდებული საუბრობს, რომ შეთანხმდა, თავდაპირველი პოზიცია ჰქონდათ სწორი, როდესაც დავით გარეჯთან დაკავშირებით საზღვრის ხაზი უნდა გასულიყო უდაბნოს მთის კალთის ქვეშ, შესაბამისად ამ კომპლექსის აბასოლუტური უმეტესობა თითქმის საქართველოს ტერიტორიაში მოხვდებოდა, რაც ისტორიულადაც ასეა, თუმცა შემდგომ შეთანხმდა და საზღვრის ხაზმა გაიარა ქედის თხემზე“, - განაცხადა მიხეილ სადრაძემ.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.