სასამართლომ სოფელ კისისხევში მკვლელობასა და მკვლელობის მცდელობაში ბრალდებული პატიმრობაში დატოვა

თელავის რაიონულმა სასამართლომ, სოფელ კისისხევში, 28 წლის ქალის მკვლელობისა და ერთი კაცის დაჭრის ბრალდებით დაკავებული ჯარჯი არაბული პატიმრობაში დატოვა.

პროცესზე პროკურორის მიერ დაკავებულის პატიმრობაში დატოვების შუამდგომლობა გააპროტესტა დაცვის მხარემ იმ არგუმენტით, რომ ბრალდებულს ჯანმრთელობის პრობლემები აქვს, რის გამოც მან აღკვეთის გაუქმება მოითხოვა. ამ მოთხოვნას მოსამართლე არ დაეთანხმა.

პროცესს ესწრებოდა თავად ბრალდებულიც. ის ჩადენილ დანაშაულს აღიარებს, თუმცა თქვა, რომ მკვლელობა განზრახ არ ჩაუდენია და მომხდარის დროს აფექტურ მდგომარეობამდე სუფრის წევრებმა მიიყვანეს.

46 წლის კაცს საგამოძიებო უწყება განზრახ მკვლელობასა და მკვლელობის მცდელობას ედავება.

მკვლელობა 22 იანვარს, თელავის მუნიციპალიტეტის სოფელ კისისხვეში მდებარე ერთ-ერთ ფერმაში მოხდა. 46 წლის ჯარჯი არაბულმა ჯერ მისი ნაცნობი კაცი დაჭრა, ამის შემდეგ კი ახალგაზრდა ქალს ცივი იარაღით სხეულის სხვადასხვა ადგილზე სასიკვდილოდ ჭრილობები მიაყენა.

მომხდარზე გამოძიება, საქართველოს სისხლის სამართლის კოდექსის 108-ე მუხლით და 19-109-ე მუხლის მე-3 ნაწილის „ა“ ქვეპუნქტით მიმდინარეობს.