ადვოკატის განცხადებით, გიორგი აბდალაძეზე ციხეში ფსიქოლოგიური ზეწოლა ხორციელდებოდა

ე.წ ფოტოგრაფების საქმეზე დღეს თბილისის საქალაქო სასამართლოში გამართულ პროცესზე ბრალდების მოწმე ვლადიმერ მაჭარაშვილი დაიკითხა. ის და ეკა ბესელია ფოტორეპორტიორ გიორგი აბდალაძის უფლებადამცველები იყვნენ. მოწმემ დეტალურად გაიხსენა 2011 წლის ივლისის მოვლენები. მისი განცხადებით, დაკავების შემდეგ აბდალაძე მხნედ იყო და თავს უდანაშაულოდ თვლიდა, თუმცა როდესაც ადვოკატმა რამდენიმე დღეში ისევ მოინახულა დაკავებული ფოტოგრაფი, ის უკვე ფსიქოლოგიური ზეწოლის ქვეშ იყო და მისი მდგომარეობა დამძიმდა. საპატიმროში აბდალაძემ მას უთხრა, რომ მათი საუბარი იწერებოდა და თუკი ადვოკატს სურდა გაეგო მისი დუმილის მიზეზი, უნდა გამოეთხოვა ციხის ადმინისტრაციიდან სათვალთვალო კამერების ჩანაწერები. ამ საუბრიდან რამდენიმე დღის შემდეგ, მოწმის თქმით, მას დაურეკეს კონტრდაზვერვის თანამშრომლებმა და უთხრეს, რომ აბდალაძე აღიარებითი ჩვენების მიცემას გეგმავდა. გიორგი აბდალაძის ადვოკატებები სასჯელაღსრულების დაწესებულებაში მისვლის შემდეგ აღიარებით ჩვენებას ხელი არ მოაწერეს.

საქმის პროკურორის განცხადებით, მოწმემ ბრალდებულების დანაშაული ზეწოლასთან დაკავშირებით დაადასტურა. კონტრდაზვერვის ყოფილი მაღალჩინოსნის დავით დევნოზაშვილის ადვოკატის თქმით კი,  მოწმე მაჭარაშვილს ბრალდებულების სახელები და გვარები არ დაუსახელებია. მომდევნო სხდომაზე სავარაუდოდ დეპუტატი ეკა ბესელია დაიკითხება.

ფოტოგრაფების საქმეზე მიმდინარე პროცესზე 2 ივნისის პროცესზე გლდანის ნომერ მერვე სასჯელაღსრულების ყოფილი და მოქმედი თანამშრომლები დაკითხეს. 

ფოტოგრაფების საქმეზე უკვე დაკითხეს გიორგი აბდალაძე, ზურაბ ქურციკიძე, ირაკლი და ნათია გედენიძეები. შინაგან საქმეთა სამინისტროს კონტრდაზვერვის დეპარტამენტმა 2011 წლის 7 ივლისს ფოტოგრაფები დააკავა, მათ  ჯაშუშობაში ადანაშაულებდნენ. დაკავებული იყვნენ ევროპის პრესფოტოს სააგენტოს ფოტოგრაფი ზურაბ ქურციკიძე, ყოფილი პრეზიდენტის პირადი ფოტოგრაფი ირაკლი გედენიძე, მისი მეუღლე, “პრაიმ ტაიმის” ფოტორეპორტიორი ნათია გედენიძე და საგარეო საქმეთა სამინისტროს პრესამსახურის ფოტოგრაფი გია აბდალაძე.  

პროკურატურამ ე.წ ფოტოგრაფების საქმე 2016 წელს გახსნა. უწყების განცხადებით ფოტოგრაფები: გიორგი აბდალაძე, ზურაბ ქურციკიძე და ირაკლი გედენიძე ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა.