ბესელია: გიორგი აბდალაძეზე ყოველდღიური ზეწოლა და წნეხი იყო

თბილისის საქალაქო სასამართლოში „ფოტოგრაფების საქმეზე“ დეპუტატი ეკა ბესელია იკითხება. დაკითხვაზე მან ფოტოგრაფებზე განხორციელებული ზეწოლის შესახებ ილაპარაკა და თქვა, რომ გიორგი აბდალაძე მას დახმარებას სთხოვდა. ბესელიას თქმით, აბდალაძესთან პირველივე შეხვედრაზე შენიშნა, რომ ის დიდი ფსიქოლოგიური ზეწოლის ქვეშ იყო.

ეკა ბესელიას განცხადებით, გიორგი აბდალაძეს შიმშილის შეწყვეტას სთხოვდნენ, წინააღმდეგ შემთხვევაში, თანამესაკნის წამებით ემუქრებოდნენ.

"ერთ-ერთ შეხვედრაზე გიორგი აბდალაძემ მითხრა - მე ამას ვერ გავუძლებ. თან მეუბნებოდა, რომ არ მიმატოვოო. როგორც ჩანს, ჩემი აცილების საკითხი დგებოდა პერიოდულად... დაგვიბარეს ციხეში და როცა მივედით, შეგვიყვანეს დირექტორის კაბინეტში. იქ უკვე გამზადებული იყო კამერა. მივხვდი, რაც იყო. საჩვენებელ დაკითხვას ამზადებდნენ. მოვითხოვე, მარტო დავეტოვებინეთ გიორგისთან. თავიდან არ მტოვებდნენ, მაგრამ როცა ვთქვი, რომ არ მოვიღებდი მონაწილეობას ამ პროცესში, მაშინ გავიდნენ. ვკითხე, რას აპირებდა. მითხრა, არ ვაპირებ ჩვენების მიცემასო. რომ ჩავეძიე, ჟურნალის ყუაზე მიმიწერა,  ჯიბეში "ჟუჩოკი" მაქვსო. დაიწყო ჩვენების მიცემა. გამომძიებელმა სამჯერ ჰკითხა, აღიარებდა თუ არა დანაშაულს? და მხოლოდ მესამე კითხვის შემდეგ თქვა, რომ აღიარებდა. დავწერე ოქმში, რომ ეს არ იყო ჩვენება, რომელსაც ადამიანი თავისუფლად აძლევს, ეს იყო ჩვენება, რომლითაც ადამიანი გააზრებულად იბრალებს დანაშაულს, რათა ციხიდან ცოცხალი გამოვიდეს. მერე მომიყვა, რომ აღიარებითი ჩვენების მიცემამდე მთელი ღამე „ამუშავებდნენ“ კონტრდაზვერვის, პროკურატურის თანამშრომლები. როლები ჰქონდათ განაწილებული, როგორც ვიცი, ჩემი როლიც ჰქონდა ერთ-ერთს, როგორ მოვიქცეოდი ჩვენების მიცემისას და რა რეაგირება უნდა ჰქონოდა აბდალაძეს ამაზე", - განაცხადა ეკა ბესელიამ სასამართლოს სხდომაზე.

ეკა ბესელია 2006 წელს, გიორგი აბდალაძის ადვოკატი იყო, როდესაც ფოტორეპორტიორი ჯაშუშობის ბრალდებით დააკავეს. ადვოკატი მაშინ აცხადებდა, რომ სასჯელაღსრულების დაწესებულებაში, აბდალაძეზე ფსიქოლოგიური ზეწოლა ხორციელდებოდა და მას მუქარით აიძულებდნენ აღიარებითი ჩვენების მიცემას.

ფოტოგრაფების საქმეზე უკვე დაკითხეს გიორგი აბდალაძე, ზურაბ ქურციკიძე, ირაკლი და ნათია გედენიძეები. შინაგან საქმეთა სამინისტროს კონტრდაზვერვის დეპარტამენტმა 2011 წლის 7 ივლისს ფოტოგრაფები დააკავა, მათ  ჯაშუშობაში ადანაშაულებდნენ. დაკავებული იყვნენ ევროპის პრესფოტოს სააგენტოს ფოტოგრაფი ზურაბ ქურციკიძე, ყოფილი პრეზიდენტის პირადი ფოტოგრაფი ირაკლი გედენიძე, მისი მეუღლე, “პრაიმ ტაიმის” ფოტორეპორტიორი ნათია გედენიძე და საგარეო საქმეთა სამინისტროს პრესამსახურის ფოტოგრაფი გია აბდალაძე.  

პროკურატურამ ე.წ ფოტოგრაფების საქმე 2016 წელს გახსნა. უწყების განცხადებით ფოტოგრაფები: გიორგი აბდალაძე, ზურაბ ქურციკიძე და ირაკლი გედენიძე ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა.