ამირან გულუაშვილი: მოქმედი სისხლის სამართლის საპროცესო კოდექსი გირაოს ოდენობის გაზრდას არ კრძალავს

მოქმედი სისხლის სამართლის საპროცესო კოდექსი არ კრძალავს გირაოს ოდენობის გაზრდას, როდესაც ბრალდებული პირველადად გამოყენებულ გირაოს პირობებს არღვევს. უფრო მეტიც, არაერთ იურიდიულ ლიტერატურაში ნახსენებია, რომ გირაოს გამკაცრება და მისი ოდენობის გაზრდა წარმოადგენს უფრო მკაცრ აღკვეთის ღონისძიებას, - ამის შესახებ ტელეკომპანია „იმედის“ გადაცემაში „დღის ქრონიკა“ პროკურორმა, ამირან გულუაშვილმა განაცხადა.

„დღეს გენერალურმა პროკურატურამ ნიკა მელიასთვის გირაოს უფრო მკაცრი აღკვეთის ღონისძიებით - პატიმრობით შეცვლის შესახებ სასამართლოსთვის შუამდგომლობით მიმართვასთან დაკავშირებით, თანხმობის გაცემის თაობაზე პარლამენტს მიმართა. პირველ ჯერზე ნიკა მელიამ სრულად უზრუნველყო გირაოს თანხის შეტანა. მას ელექტრონული სამაჯური დაახლოებით 16 თვის განმავლობაში ეკეთა და მელია პირნათლად ასრულებდა გირაოს დაკისრების მოთხოვნებს. გასული წლის 1-ელ ნოემბერს მან დემონსტრაციულად მოიხსნა სამაჯური, რითაც დაარღვია მის მიმართ გამოყენებული აღკვეთის ღონისძიება. იმის გათვალისწინებით, რომ წელიწადნახევრის განმავლობაში ის კანონის ფარგლებში მოქმედებდა, ჩვენ მივიჩნიეთ, რომ სამაჯურის დემონსტრაციულად მოხსნა არ წარმოადგენდა იმდენად მნიშვნელოვან დარღვევას, რომ ნიკა მელიას დაპატიმრება მოგვეთხოვა. ჩვენ ჩავთვალეთ, რომ გირაოს ოდენობის გაზრდა სრულად უზრუნველყოფდა აღკვეთის ღონისძიების მიზნებს. მინდა ვისაუბრო დაცვის მხარის არგუმენტებზე. პირველ რიგში, მოქმედი სისხლის სამართლის საპროცესო კოდექსი არ კრძალავს გირაოს ოდენობის გაზრდას, როდესაც ბრალდებული პირველადად გამოყენებულ გირაოს პირობებს არღვევს. უფრო მეტიც, არაერთ იურიდიულ ლიტერატურაში ნახსენებია, რომ გირაოს გამკაცრება და მისი ოდენობის გაზრდა წარმოადგენს უფრო მკაცრ აღკვეთის ღონისძიებას. შესაბამისად, ბრალდების მხარის ეს შუამდგომლობა, გირაოს 70 ათას ლარამდე გაზრდის შესახებ სრულად შეესაბამება მოქმედ კანონმდებლობას. 1-ლი ნოემბრის პოლიტიკური პერფორმანსის შემდეგ დაეკისრა დამატებით 40 000 ლარის შეტანა. მიუხედავად ამისა, სასამართლოს მიერ დადგენილ 50-დღიან ვადაში მელიამ არ შეიტანა თანხა და არც მისი ექვივალენტური უძრავი ქონებით უზრუნველყო გირაო“, - განაცხადა პროკურორმა.

„პოლიტიკურად მოტივირებული საქმის გირაოს გადახდას არ ვაპირებ“, - ამის შესახებ „ნაციონალური მოძრაობის“ თავმჯდომარემ, ნიკა მელიამ პარტიის ოფისში გამართულ ბრიფინგზე განაცხადა

ნაციონალური მოძრაობის“ თავმჯდომარეს, ნიკა მელიას გირაოს დარჩენილი თანხის გადახდის ვადა დღეს ეწურება. პროკურატურამ პარლამენტს ნიკა მელიას დასაპატიმრებლად შუამდგომლობაზე თანხმობა სთხოვა.