მოსამართლემ მიხეილ თათრიშვილი გაამართლა

დღეს, მოსამართლე გიორგი დარახველიძემ მიხეილ თათარიშვილის საქმეზე გამამართლებელი განაჩენი დაადგინა.

„დღევანდელი განაჩენით დადასტურდა, რომ მიხეილ თათრიშვილს სამართალდამცველები მის მიერ გაკეთებული განცხადებების გამო ედავებოდნენ“, - განაცხადა პროცესის დასრულების შემდეგ საქართველოს პრეზიდენტის სიძემ, მინდია გოგოჭურმა.

როგორც მინდია გოგოჭურმა აღნიშნა, მიხეილ თათარიშვილის წინააღმდეგ საქმე ეფუძნებოდა შურისძიებას სამართალდამცველების მხრიდან და არანაირ ნარკოდანაშაულს ადგილი არ ჰქონია.

მინდია გოგოჭურმა იმედი გამოთქვა, რომ ანალოგიურად ნარკოდანაშულისთვის დაკავებულია მათი კიდევ ერთი მეგობარი თორნიკე კაჭარავა, რომელიც ისევე უდანაშაულოა, როგორც მიხეილ თათარიშვილი.

6 ივლისს სასამართლო პროცესზე მოსამართლემ მხარეების დასკვნითი სიტყვები მოისმინა, ასევე საბოლოო სიტყვა ბრალდებულმა მიხეილ თათრიშვილმა წარმოთქვა.

ნარკოდანაშაულის საქმეზე დაკავებული, მიხეილ თათრიშვილი, მოსამართლის გადაწყვეტილებით, სასამართლო დარბაზიდან გირაოს სანაცვლოდ 27 ივნისს გათავისუფლდა. მას აღკვეთის ღონისძიება პატიმრობა 10 000 ლარიანი გირაოთი შეეცვალა.

პრეზიდენტის შვილის, ანა მარგველაშვილის და სიძის, მინდია გოგოჭურის მეგობარი მიხეილ თათრიშვილი 17 მარტს დააკავეს. მას 18 აბი "სუბოტექსის" შეძენა-შენახვას ედავებიან.

18 მარტს პრეზიდენტის შვილმა Facebook-ზე გამოაქვეყნა ვიდეო, რომელშიც გოგოჭურმა და თათრიშვილმა ერთმანეთი გადაიღეს იმის დასტურად, რომ მათ ჯიბეებში არაფერი უდევთ. ანა მარგველაშვილმა განაცხადა, რომ თათრიშვილს სუბოტექსი ჩაუდეს. 20 მარტს ამ განცხადებას შს მინისტრი და მთავარი პროკურორი გამოეხმაურნენ და თქვეს, რომ პოლიციელების მიმართ მსგავს პრეტენზიებს მტკიცებულებები სჭირდება.