დავით გარეჯის საქმეზე არსებითი განხილვა გაიმართა

დავით გარეჯის საქმეზე არსებითი განხილვა გაიმართა. დღევანდელ პროცესზე ბრალდების მხარის მოწმე, ლევან ჯღარკავა გამოიკითხა. მას პასუხების გაცემა კომისიის საქმიანობასთან დაკავშირებით მოუწია.

ლევან ჯღარკავა 2006-2008 წელს სადემარკაციო კომისიის წევრი იყო. ის საქართველოს ფინანსთა სამინისტროს საბაჟო კონტროლის ორგანიზაციის სამმართველოს უფროსის პოზიციას იკავებდა. აქედან გამომდინარე, ამ პერიოდში, იყო კომისიის წევრიც. დღეს მან სასამართლო სხდომაზე თქვა, რომ კომისიის წევრობის პერიოდში, არცერთ სხდომაზე, რომელსაც თავად ესწრებოდა, დავით გარეჯის საკითხი არ განხილულა. სხდომის დასრულების შემდეგ, ეს ინფორმაცია დაადასტურა ბრალდებულმა ივერი მელაშვილმაც.

„რა თქმა უნდა, ბატონი ლევანი იყო კომისიის წევრი. მას, აზერბაიჯანთან დაკავშირებით, არსებით განხილვებში მონაწილეობა არ მიუღია. როცა სხდომები იმართებოდა, მიმდინარეობდა წინასწარ განხილვები. ლევანი იმ დროს იყო, როცა აზერბაიჯანთან არც გამართულა სხდომა“, - აღნიშნა სხდომის შემდეგ ივერი მელაშვილმა ჟურნალისტებთან საუბრისას.

ბრალდებულის ინტერესების დამცველები აცხადებენ, რომ მოწმის დღევანდელ ჩვენებას არანაირი სამართლებრივი ფასეულობა არ აქვს. პროკურორი კი ამბობს, რომ ლევან ჯღარკავასა და საქმესთან დაკავშირებით არსებული სხვა მოწმეების ჩვენებები შექმნის იმ სურათს, რომლის საფუძველზეც, თბილისის საქალაქო სასამართლომ გადაწყვეტილება უნდა მიიღოს.

ივერი მელაშვილსა და ნატალია ილიჩოვას საქართველოს ინტერესების საწინააღმდეგოდ ქმედება ედებათ ბრალად.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.

28 იანვარს, ივერი მელაშვილი და ნატალია ილიჩოვა სასამართლო დარბაზიდანვე გათავისუფლდნენ. მათ სასამართლომ გირაო შეუფარდა.