დიმიტრი გვრიტიშვილი: სასამართლო ხელისუფლების დამოუკიდებლობის გარანტი უვადოდ დანიშნული მოსამართლეა

უვადოდ დანიშნული მოსამართლეა გარანტი სასამართლო ხელისუფლების დამოუკიდებლობისა. გარანტი იმისა, რომ მასზე ვერც შიდა და ვერც გარე ძალები ვერანაირ ზემოქმედებას ვერ მოახდენენ, - ამის შესახებ იუსტიციის უმაღლესი საბჭოს მოსამართლე წევრმა, დიმიტრი გვრიტიშვილმა „ქრონიკაში“ ჩართვისას განაცხადა.

მისი თქმით, მოსამართლეთა მიმართ უარყოფითი კამპანია წლების განმავლობაში მიმდინარეობს. გვრიტიშვილმა აღნიშნა, რომ მაგალითად, დღესაც მოისმინა პარლამენტის ორი წევრისგან, „ლელოს“ წარმომადგენლებისგან აბსოლუტურად მიუღებელი განცხადებები.

„აცხადებენ, კლანური მმართველობის ინტერესია ის, რომ სასამართლო კორპუსი იყოს მორჩილებაში გარკვეული ჯგუფის მიერ. თუ ეს ასეა, საუკეთესო ბერკეტი მოსამართლეთა მორჩილებაში ყოფნისთვის არის ის, რომ შევინარჩუნოთ მათი მოწყვლადობა. მოსამართლე მოწყვლადია მაშინ, როდესაც იგი უვადოდ არ არის დანიშნული; როდესაც შესაძლებელია მასზე ზემოქმედება იმ კუთხით, რომ უფლებამოსილების ვადა მას ეწურება და ამ გაურკვეველმა კლანმა თავისი ინტერესის გასატარებლად მოსამართლეზე ზემოქმედების ბერკეტი შეინარჩუნოს.

გადახედეთ საბჭოს წევრების საქმიანობას. 2017 წლიდან მოყოლებული ჩვენ აბსოლუტურად საწინააღმდეგო მიმართულებით მივდიოდით. მიუხედავად ჩვენზე უზარმაზარი ზეწოლისა, რომელიც სხვადასხვა სუბიექტიდან მომდინარეობდა, ჩვენ ყოველთვის ვცილობდით, რომ მოსამართლეთა კორპუსი მთლიანად უვადოდ ყოფილიყო დანიშნული. ჩვენი არაადამიანური ძალისხმევის შედეგია, რომ მოსამართლეთა კორპუსის 80% უვადოდ არის დანიშნული. ესაა საერთაშორისო სტანდარტი იმისა, რომ უვადოდ დანიშნული მოსამართლეა გარანტი სასამართლო ხელისუფლების დამოუკიდებლობისა. გარანტი იმისა, რომ მასზე ვერც შიდა და ვერც გარე ძალები ვერანაირ ზემოქმედებას ვერ მოახდენენ“, - განაცხადა გვრიტიშვილმა.

ხვალ, 12:00 საათზე, მოსამართლეთა კონფერენცია გაიმართება, რომელმაც იუსტიციის უმაღლესი საბჭოს ოთხი ახალი მოსამართლე წევრი უნდა აირჩიოს. კონფერენციის პარალელურად საპროტესტო აქციის გამრთვაც იგეგმება.