მიხეილ სააკაშვილი: ბევრი ისეთი შეცდომა მქონდა, რომელსაც ძალიან მწარედ ვნანობ, პირველ რიგში ჩემი შეცდომაა ეს სასამართლო

მქონდა თუ არა შეცდომები?! საკმარისზე მეტი - ბევრი ისეთი შეცდომა, რომელსაც ძალიან მწარედ ვნანობ. პირველ რიგში ჩემი შეცდომაა ეს სასამართლო. შეცდომაა ის, რომ ჩვენ ვერ შევქმენით დამოუკიდებელი სასამართლო, - ამის შესახებ საქართველოს მესამე პრეზიდენტმა მიხეილ სააკაშვილმა თავის სასამართლო პროცესზე განაცხადა.

„მე ვარ გასამართლებული უკვე ორ საქმეზე, რომ არ გამომეხედა საქართველოსკენ. ერთი საქმე ეხება გაუგონარ რაღაცას, პრეზიდენტის მიერ შეწყალებას ეგრეთწოდებულ გირგვლიანის საქმეზე, რომელიც არანაირი გირგვლიანის საქმე არ არის და ასე დაარქვეს „პიარისთვის“. ის ოფიცრები იყვნენ დაკავებულები 2008 წლის ომის შემდეგ, მოხდა სამხედროების ამნისტია, იქიდან გავიდა 6 თვე და მოსამართლემ გამოუშვა ესენი და აქედან ერთი ახლა მე პიჯაკების საქმეზე მასამართლებს. გელაშვილის საქმეზე ერთადერთი ჩვენება არის კლასიკური ინგლისური ტერმინი - Hearsay, რაც ნიშნავს, რომ მე გავიგე, რომ იმან გაიგო, ამ ჩვენებით ვარ გასამართლებული, რომელიც მსოფლიოს არცერთ ქვეყანაში, არცერთ სამართლებრივ სისტემაში არ შეიძლება მიღებული იყოს, როგორც მტკიცებულება. რა გასაკვირია, რომ როცა ეს განაჩენები გამოიტანეს და ინტერპოლს გაუგზავნეს ინტერპოლმა გადაიხარხარა და თავზე გადაგახიათ ეს განაჩენები, როგორც სამარცხვინო და არც დაუწყიათ მათი განხილვა“,- განაცხადა მიხეილ სააკაშვილმა.

მან ასევე 7 ნოემბრის აქციის დარბევის, ტელეკომპანია „იმედში“ შეჭრის და ბადრი პატარკაციშვილის ქონების დაუფლების საქმეზეც გააკეთა კომენტარი.

„მუდმივად რომ ატრიალებთ 7 ნოემბრის კადრებს, რომელიც ჩემთვის ძალიან უსიამოვნო საყურებელია და მე დღემდე ცუდად ვიგონებ ამას, გუშინ არ გქონდათ 20 ივნისი?! შეადარეთ დაზარალებულთა რაოდენობა 20 ივნისს და 7 ნოემბერს. გუშინ არ გქონდათ ლექსო ლაშქარავას მკვლელობა, რომელიც წაახალისა საქართველოს უმაღლესი თანამდებობის პირმა. ეს იყო რთული პერიოდი იმ გაგებით, რომ ჩვენ ძალიან მტკივნეული რეფორმები ჩავატარეთ. მაგალითად, რამდენიმე ათეული ათასი პოლიციელი დარჩა უმუშევარი, ძალიან ბევრი ადამიანი ვერ გადაეწყო ახალ რელსებზე, ამიტომ ხალხს ჰქონდა ობიექტური შესაძლებლობა, რომ ყოფილიყვნენ ჩვენზე გაბრაზებულები. შემდეგ გაგრძელდა პატარა აქციები და 7-ში დილას მაღვიძებენ და მეუბნებიან, რომ იქ რაღაც პატარა შეტაკება მოუვიდა პოლიციას, რაც გადაიზარდა უფრო დიდ შეტაკებაში და დაახლოებით იგივე მოხდა, რაც დღეს სასამართლოს წინ, როცა მოქალაქეს გაზი შეასხეს და ვიღაცები დააკავეს. ამის შემდეგ, ბევრად მეტი ხალხი გამოვიდა. ამ თემას კურირებდა შინაგან საქმეთა მინისტრი. ამ ყველაფერს მე ტელევიზიით ვუყურებდი და არავისთვის არანაირი ინსტრუქციები არ მიმიცია. ისინი ასრულებდნენ მოვალეობას, როგორც მათ ესმოდათ და როგორი გამოცდილებაც ჰქონდა ჩვენს პოლიციას, რომელიც იყო მაშინ ძალიან ახალგაზრდა და გამოუცდელი. ღმერთმა დაგვიფარა და არავინ დაიღუპა ამ შეტაკებების დროს. ერთი ადამიანი დაშავდა მძიმედ, ვისთანაც მე შემდეგ სახლში მივედი. ასეთი რაღაც ხდება ძალიან ბევრ ქვეყანაში და არავის აზრად არ მოსდის ამაზე საქმეების აღძვრა“,- განაცხადა მიხეილ სააკაშვილმა.

ყოფილმა პრეზიდენტმა ასევე თქვა, რომ მისი ხელისუფლებაში ყოფნის პერიოდში საკმარისზე მეტი შეცდომა დაუშვა.

„მქონდა თუ არა შეცდომები?! საკმარისზე მეტი. ბევრი ისეთი შეცდომა, რომელსაც ძალიან მწარედ ვნანობ. პირველ რიგში ჩემი შეცდომაა ეს სასამართლო. შეცდომაა ის, რომ ჩვენ ვერ შევქმენით დამოუკიდებელი სასამართლო, რაც შეეხო ძალიან ბევრ ჩვენს თანამემამულეს და ახლა მეხება მეც. ბოდიშს ვუხდი ყველას, ვისაც ეს შეეხო, ისევე, როგორც ყველა სხვა შეცდომაზე, რომელიც უნებურად თქვენ შეგეხოთ. ბოდიშს გიხდით კიდევ ერთხელ“, - განაცხადა სააკაშვილმა.