ქეთევან ჩაჩავა გაფლანგვის საქმეზე: ეს არის გართობის, მოგზაურობის, დასვენების ხარჯები, რომლებიც კანონმდებლობის თანახმად, სახელმწიფო ბიუჯეტიდან არ უნდა ყოფილიყო ანაზღაურებული

სახელმწიფო დაცვის ასიგნებებიდან გაწეული ხარჯი არ არის მივლინებების დროს გაწეული ხარჯი, - ამის შესახებ პროკურორმა ქეთევან ჩაჩავამ გადაცემაში „იმედი LIVE“ განაცხადა. მისი თქმით, მივლინების დროს დგება შესაბამისი პროტოკოლი და ხარჯი პრეზიდენტის ადმინისტრაციიდან გაიწევა. საქმეში კი საუბარი არაოფიციალური ვიზიტების დროს გაწეულ ხარჯებზეა, რომლებსაც სამსახურებრივ საქმიანობასთან კავშირი არ აქვს.

„ეს არის გართობის, მოგზაურობის, დასვენების ხარჯები, რომლებიც საქართველოს კანონმდებლობის თანახმად, სახელმწიფო ბიუჯეტიდან არ უნდა ყოფილიყო ანაზღაურებული. ​​დოკუმენტაციაში, რომელიც სახელმწიფო დაცვის სპეციალურ სამსახურში წარმოდგენილია გრიფით „საიდუმლო“, არის ასახული დანახარჯები, თუმცა არსად არის მითითებულ ამ დანახარჯებიდან რა სიკეთე მიიღო საქართველოს სახელმწიფომ. ფიზიკურად არ არსებობს ასეთი დოკუმენტი პირობაში, იმიტომ, რომ ეს იყო საქართველოს ყოფილი პრეზიდენტის კომფორტისთვის, პირადი დაინტერესებისთვის, პირადი მოგზაურობისთვის, არაოფიციალური ვიზიტების დროს გაწეული ხარჯი“, - ამბობს პროკურორი.

9 მილიონის გაფლანგვის საქმეზე ექსპრეზიდენტი მიხეილ სააკაშვილი და სახელმწიფო დაცვის სპეციალური სამსახურის ყოფილი ხელმძღვანელი, თემურ ჯანაშია არიან ბრალდებულები. თანხიდან მსხვილ ნაწილს იკავებს კოსმეტიკური ხარჯები და წარმოდგენილია 721 ათასი ლარით. კოსმეტიკურ ხარჯებში იგულისხმება: მეზოთერაპია, ლიპოსაქცია, მუცლიდან ცხიმის გამოღება, ბოტოქსის ინექცია, სხვადასხვა გამაახალგაზრდავებელი თუ გამაჯანსაღებელი პროცედურა, რომელიც მიღებული აქვს ძვირადღირებულ ქალაქებში, ისეთებში, როგორებიცაა ნიუ-იორკი, მიუნხენი, მილანი, ბადენ-ბადენი, ლონდონი და სხვა.

საქართველოს ყოფილი პრეზიდენტი 1-ელ ოქტომბერს დააკავეს.

მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა ექვსი წლის ვადით. ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევისა და პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.