სუსი: საანგარიშო პერიოდში ანტიკორუფციული სააგენტო ეფექტიანად განაგრძობდა კორუფციის საწინააღმდეგო ღონისძიებებს - გატარებული საგამოძიებო ღონისძიებების შედეგად, პასუხისგებაში მიეცა არაერთი თანამდებობის პირი და საჯარო მოხელე

სახელმწიფო უსაფრთხოების სამსახურის 2021 წლის ანგარიშში, რომელიც პარლამენტს განსახილველად წარედგინა, კორუფციის წინააღმდეგ ბრძოლის საკითხზეცაა საუბარი. დოკუმენტში წერია, რომ საანგარიშო პერიოდში სახელმწიფო უსაფრთხოების სამსახურის ანტიკორუფციული სააგენტო ეფექტიანად განაგრძობდა კორუფციის საწინააღმდეგო კომპლექსურ ღონისძიებებს. უწყების ცნობითვე, გატარებული ოპერატიულ-სამძებრო და საგამოძიებო ღონისძიებების შედეგად, დაკავებულია და ბრალდებულის სახით პასუხისგებაში მიეცა არაერთი თანამდებობის პირი და საჯარო მოხელე.

„2021 წელს ანტიკორუფციული სააგენტოს მიერ გამოძიება დაიწყო სისხლის სამართლის 53 საქმეზე, კერძოდ, დიდი ოდენობით ქრთამის აღების, ქრთამის მიცემის, სამსახურებრივი უფლებამოსილების ბოროტად გამოყენების, უკანონო შემოსავლის ლეგალიზაციის, თაღლითობისა და სხვა ფაქტებზე. ბრალდებულის სახით სისხლის სამართლის პასუხისგებაში მიეცა 162 პირი. საანგარიშო წლის განმავლობაში სახელმწიფო უსაფრთხოების სამსახურის ანტიკორუფციული სააგენტოს წარმოებაში არსებულ სისხლის სამართლის საქმეებზე ყადაღა დაედო 153 უძრავ და 7 მოძრავ ქონებას. შეფასებული ქონების სავარაუდო ღირებულება შეადგენს დაახლოებით 3 200 000 ლარს. ამასთან, საგამოძიებო მოქმედებების შედეგად, 2021 წელს ამოღებულ იქნა დაახლოებით 1 850 000 ლარის ეკვივალენტი სხვადასხვა ფულადი თანხა“, - წერია ანგარიშში.

სუს-ის ცნობით, 2021 წლის განმავლობაში გატარებული ეფექტიანი ღონისძიებების მიუხედავად, კორონავირუსის პანდემიასთან დაკავშირებულმა გარემოებებმა კვლავ გარკვეული გავლენა იქონია ანტიკორუფციულ საქმიანობაზე.

ამასთან, უწყების ცნობით, აღსანიშნავია, რომ უნებართვო არქეოლოგიური სამუშაოების ფაქტზე მიმდინარე გამოძიების ფარგლებში, 2021 წელს სამსახურის ანტიკორუფციული სააგენტოს თანამშრომლების მიერ ამოღებული იყო უმნიშვნელოვანესი ისტორიული ღირებულების არტეფაქტი - საქართველოს მეფე დავით მეოთხე აღმაშენებლის პერიოდის უნიკალური მონეტა, რომელიც გადაეცა საქართველოს ეროვნულ მუზეუმს.

ანგარიშში ვკითხულობთ, რომ საანგარიშო პერიოდში სახელმწიფო უსაფრთხოების სამსახურის ანტიკორუფციული სააგენტო განაგრძობდა კორუფციული ფაქტების თავიდან აცილების, მათი ადრეულ ეტაპზე გამოვლენისა და აღკვეთისკენ მიმართულ ძალისხმევას. აქტიურ რეჟიმში მიმდინარეობდა ოპერატიულ-სამძებრო და საგამოძიებო მოქმედებები, განხორციელდა მთელი რიგი ანალიტიკური და პრევენციული ღონისძიებები.

„პრიორიტეტულ მიმართულებად რჩებოდა კორუფციულ და სამოხელეო დანაშაულებში საჯარო მოხელეების შესაძლო ჩართულობის პრევენცია და აღნიშნულით უცხო ქვეყნების სპეციალური სამსახურებისა თუ სხვადასხვა დანაშაულებრივი ჯგუფების/ცალკეული პირების მიმართ მათი მოწყვლადობის რისკების შემცირება.

2021 წელს კიდევ უფრო გაძლიერდა სააგენტოს შემადგენლობაში შემავალი კორუფციის პრევენციის სამსახურის პროფესიული და ინსტიტუციური შესაძლებლობები. ხსენებული დანაყოფის მიერ, საუკეთესო საერთაშორისო გამოცდილების შესწავლისა და ანალიზის საფუძველზე, მომზადდა არაერთი წინადადება და ინიციატივა. აღნიშნული მოიცავდა როგორც კორუფციულ დანაშაულებზე საჯარო მოხელეების ცნობიერების ამაღლების მიმართულებას, ასევე კორუფციის წინააღმდეგ ბრძოლაში საზოგადოების მეტი ჩართულობისთვის ხელშეწყობას“, - წერია ანგარიშში.

დოკუმენტის მიხედვით, საანგარიშო პერიოდში, სამსახურის ანტიკორუფციული სააგენტოს მიერ საზოგადოებასთან ეფექტიანი კომუნიკაციისა და პრევენციის მიმართულებით განხორციელებული სხვადასხვა ღონისძიების შედეგად, მნიშვნელოვნად გაიზარდა კორუფციული ფაქტების გამოვლენის კუთხით მოქალაქეთა ჩართულობა.

„აღნიშნულს, მათ შორის, მოწმობს სააგენტოში 2021 წელს შესაძლო კორუფციულ სამართალდარღვევებზე მოქალაქეეთა მხრიდან შემოსული განცხადებები. კერძოდ, წლის განმავლობაში შემოვიდა 83 განცხადება, აქედან: 23 მათგანზე, მოქალაქეებთან აქტიური კომუნიკაციის შედეგად, დაიწყო გამოძიება; 29 განცხადება, კომპეტენციის გათვალისწინებით, გადაიგზავნა სხვა უწყებაში; 7 განცხადებაზე მიმდინარეობს შესწავლა; ხოლო 23 განცხადება არ შეიცავდა დანაშაულის ნიშნებს; ერთი განცხადება დაერთო არსებულ სისხლის სამართლის საქმეს.

2021 წელს კორუფციასთან ბრძოლის საკითხებზე განხორციელდა სახელმწიფო და ადგილობრივი თვითმმართველობის ორგანოებისთვის გამიზნული ე.წ. საინფორმაციო შეხვედრების პროექტი. აღნიშნული პროექტი მომზადდა სახელმწიფო უსაფრთხოების სამსახურისა და ევროპის საბჭოს თანამშრომლობით, ევროკავშირის მიერ დაფინანსებული პროგრამის ფარგლებში. ამასთანავე, პროექტის თემატიკისა და სამიზნე ჯგუფების განსაზღვრაში აქტიურად იყო ჩართული სამსახურში შექმნილი სპეციალური, შიდაუწყებრივი სამუშაო ჯგუფი, რომელშიც შედიან სხვადასხვა მიმართულების სპეციალისტები (იურისტები, ანალიტიკოსები, გამომძიებლები და საერთაშორისო ურთიერთობების სპეციალისტები).

ამასთან, აღნიშნული შეხვედრების ეფექტიანად განხორციელების მიზნით, საანგარიშო პერიოდში შეირჩა ექსპერტთა ჯგუფი, რომელმაც, ზემოხსენებული პროგრამის ფარგლებში, გაიარა სპეციალური მომზადება - „ტრენერთა ტრენინგი“. შედეგად, 2021 წელს სახელმწიფო უსაფრთხოების სამსახურის ორგანიზებითა და ევროპის საბჭოს მხარდაჭერით, გადამზადდა საჯარო უწყებებისა და ადგილობრივი თვითმმართველი ერთეულების ათეულობით წარმომადგენელი. ცნობიერების ამაღლების ღონისძიებებს მუდმივი ხასიათი აქვს და მათი ორგანიზება სამსახურის მიერ სამომავლოდაც იგეგმება“, - ვკითხულობთ დოკუმენტში.

ამავე დოკუმენტის თანახმად, საანგარიშო პერიოდში ასევე მნიშვნელოვანი იყო ევროპის საბჭოსთან პარტნიორობის ფარგლებში ე.წ. „ტექნიკური დოკუმენტის“ შემუშავება. დოკუმენტი ეფუძნება საერთაშორისო სტანდარტებსა და საუკეთესო პრაქტიკას, ასევე შესწავლილი და გაანალიზებულია საქართველოს გამოცდილება საჯარო დაწესებულებებში კორუფციასთან ბრძოლის თაობაზე. დოკუმენტი შეიცავს რეკომენდაციებსა და კონკრეტულ წინადადებებს ანტიკორუფციული სააგენტოს საქმიანობის ეფექტიანობის გაზრდის მიზნით.

„საანგარიშო პერიოდში მნიშვნელოვანი ნაბიჯები გადაიდგა კორუფციის წინააღმდეგ ბრძოლის სფეროში საერთაშორისო თანამშრომლობის გაღრმავების კუთხით. 2021 წელს ანტიკორუფციული სააგენტოს როგორც ოპერატიული, ასევე საგამოძიებო და ანალიტიკური მიმართულების ქვედანაყოფებმა მონაწილეობა მიიღეს ათეულობით შეხვედრასა და ღონისძიებაში, მათ შორის, კვალიფიკაციის ამაღლებისა და პარტნიორი ქვეყნების გამოცდილების გაზიარების მიზნით.

მიმდინარეობდა აქტიური თანამშრომლობა ევროკავშირის, ევროპის საბჭოს, ნატოს, გაეროსა და აშშ-ის საელჩოს მიერ მხარდაჭერილი პროგრამების ფარგლებში. საანგარიშო პერიოდში მაღალი დონის ორმხრივი სამუშაო ვიზიტი განხორციელდა, როგორც საქართველოში, ისე ჩეხეთის რესპუბლიკაში, სადაც განხილულ იქნა ანტიკორუფციული მიმართულებით ორი ქვეყნის საუკეთესო პრაქტიკა.

კორუფციის წინააღმდეგ ბრძოლის ეფექტიანობაზე, გარდა საგამოძიებო სტატისტიკური მონაცემებისა, ასევე მიუთითებს საერთაშორისო რეიტინგები და შეფასებები. „საერთაშორისო გამჭვირვალობის” მიერ მომზადებული კორუფციის აღქმის ინდექსის (CPI) თანახმად, 2021 წელს საქართველო 180 ქვეყნიდან 45-ე ადგილს იკავებს და მცირედით ჩამორჩება ისეთ ქვეყნებს, როგორიცაა პოლონეთი და იტალია. ამასთანავე, აღნიშნული მაჩვენებლით საქართველო უსწრებს ჩეხეთს, მალტას, სლოვაკეთს, საბერძნეთს და აღმოსავლეთ ევროპის არაერთ ქვეყანას.

2021 წელს სამსახური ანტიკორუფციული მიმართულებით ჩატარებული ღონისძიებების შესახებ საზოგადოებას მუდმივად აწვდიდა ინფორმაციას“, - ნათქვამია ინფორმაციაში.