სუსი: ტერორიზმთან ბრძოლის მიმართულებით, 2021 წელს სამსახური ეფექტურად განაგრძობდა საერთაშორისო პარტნიორებთნ ორმხრივი და მრავალმხრივი თანამშრომლობის ფორმატებში ჩართულობას

რეგიონში განსაკუთრებულად გაზრდილი საფრთხეების და ზოგადად, 2021 წელს, მსოფლიოში უსაფრთხოების კუთხით შექმნილი ახალი გამოწვევების პირობებში, ქვეყნის უსაფრთხოებისთვის კიდევ უფრო მეტ დატვირთვას იძენს მჭიდრო, მუდმივი თანამშრომლობა სტრატეგიულ პარტნიორებსა და მეგობარ სახელმწიფოებთან, ასევე, წამყვან რეგიონულ და საერთაშორისო ინსტიტუტებთან, - ამის შესახებ წერია სახელმწიფო უსაფრთხოების სამსახურის 2021 წლის ანგარიშში, რომელიც პარლამენტს განსახილველად წარედგინა.

დოკუმენტის თანახმად, საანგარიშო პერიოდში სამსახურის მხრიდან გადაიდგა არაერთი ქმედითი ნაბიჯი როგორც ორმხრივ, ასევე მრავალმხრივ ფორმატებში პარტნიორული ურთიერთობების კიდევ უფრო გაძლიერებისა და განმტკიცების მიზნით.

„სტრატეგიულ მოკავშირეებთან თანამშრომლობის ფარგლებში, სამსახურის ხელმძღვანელი პირები სისტემატურ რეჟიმში ახდენდნენ პარტნიორებთან ინფორმაციის გაცვლას უსაფრთხოების გარემოს თაობაზე, მათ შორის, ოკუპირებულ ტერიტორიებზე მიმდინარე პროცესების, მოსალოდნელი რისკების, რეგიონში განვითარებული სხვადასხვა მოვლენისა და მათთან დაკავშირებული საფრთხეებისა და გამოწვევების შესახებ. სამსახურის საქმიანობის სპეციფიკის გათვალისწინებით, მიმდინარეობდა სტრატეგიულ მოკავშირეებთან სხვადასხვა ფორმატში თანამშრომლობა და კონკრეტულ მიმართულებებზე მჭიდრო კოორდინაცია, მათ შორის, კონტრდაზვერვის, ტერორიზმის, კიბერუსაფრთხოებისა და ჰიბრიდული საფრთხეების კუთხით. 2021 წელს გაიმართა არაერთი მაღალი დონის შეხვედრა დიპლომატიური მისიების, პარტნიორი ქვეყნების შესაბამისი უწყებებისა და საერთაშორისო ორგანიზაციების ხელმძღვანელებსა და წარმომადგენლებთან“, -წერია ანგარიშში.

სუსის ინფორმაციით, საერთაშორისო პარტნიორებთან ინფორმაციის დროულად და უსაფრთხოდ გაცვლის მიზნით, სამსახურის მიერ აქტიურად და ეფექტიანად იყო გამოყენებული შესაბამისი კომუნიკაციის საერთაშორისო ინსტრუმენტები და შიდასახელმწიფოებრივი კანონმდებლობით განსაზღვრული მექანიზმები, მათ შორის, ინტერპოლისა და ევროპოლის არხები, საქართველოში აკრედიტებული მეკავშირე ოფიცრები, პოლიციის ატაშეების ქსელი და სხვა. უწყების ცნობითვე, ამ მიმართულებით, სახელმწიფო უსაფრთხოების სამსახური, 2021 წელს განაგრძობდა სამართალდაცვით და უსაფრთხოების სფეროში საერთაშორისო სამართლებრივი ჩარჩოს ეტაპობრივ განვითარებას. აღნიშნული მოიცავს ნატოსა და ევროკავშირის წევრ და სხვა პარტნიორ სახელმწიფოებთან საიდუმლო ინფორმაციის გაცვლისა და ორმხრივად დაცვის შესახებ საერთაშორისო შეთანხმებების, აგრეთვე, სამართალდაცვით სფეროში თანამშრომლობის შესახებ საერთაშორისო ხელშეკრულებებისა და მემორანდუმების გაფორმების ინიცირებას.

„დანაშაულის წინააღმდეგ ბრძოლის სფეროში თანამშრომლობის შესახებ ხელშეკრულებები საქართველოს გაფორმებული აქვს 29 პარტნიორ სახელმწიფოსთან (უმეტესობა ნატოსა და ევროკავშირის წევრი ქვეყანაა), ხოლო ევროპოლთან დადებულია ოპერატიული და სტრატეგიული თანამშრომლობის შესახებ შეთანხმება.

ამასთან, საანგარიშო პერიოდში ინიცირებულ იქნა პარტნიორ სახელმწიფოებთან საიდუმლო ინფორმაციის გაცვლისა და ორმხრივად დაცვის შესახებ შეთანხმებები, რის თაობაზეც აღნიშნული ქვეყნების შესაბამის უწყებებთან მიმდინარეობს აქტიური კონსულტაციები. სახელმწიფო უსაფრთხოების სამსახურის ინიციატივით, საქართველოს ანალოგიური შეთანხმებები სულ გაფორმებული აქვს 24 სახელმწიფოსა (უმეტესობა ნატოსა და ევროკავშირის წევრი ქვეყანაა) და ევროკავშირთან.

2021 წელს, სამსახურმა, კომპეტენციის შესაბამისად, აქტიური მონაწილეობა მიიღო საერთაშორისო დოკუმენტების შემუშავების პროცესში. სამართლებრივი და უსაფრთხოების კუთხით, დამუშავდა და ანალიზი ჩაუტარდა სხვადასხვა თემატიკის საერთაშორისო შეთანხმების 50-ზე მეტ პროექტს, მათ შორის, მიგრაციისა და უვიზო მიმოსვლის, საჰაერო მიმოსვლის, თავდაცვის, სასაზღვრო, საზღვაო, საბაჟო, ეკონომიკის, დანაშაულთან ბრძოლის და სხვა სფეროებში. აღნიშნულ დოკუმენტებთან მიმართებით სამსახურის მხრიდან განხორციელდა სახელმწიფო მნიშვნელობის უსაფრთხოების საკითხების სათანადო ასახვა/გათვალისწინება.

საერთაშორისო თანამშრომლობის მიმართულებით, სახელმწიფო უსაფრთხოების სამსახურისთვის განსაკუთრებით პრიორიტეტულია ევროკავშირისა და ნატოს წევრი ქვეყნების შესაბამის უწყებებთან უსაფრთხოების სფეროში პარტნიორული ურთიერთობები. აღსანიშნავია საქართველოს მთავარი სტრატეგიული პარტნიორის, ამერიკის შეერთებული შტატების შესაბამის უწყებებსა და საელჩოსთან ჩამოყალიბებული მჭიდრო ურთიერთობები. აღნიშნული მოიცავდა თანამშრომლობის ფართო სპექტრს, როგორც ოპერატიული, ასევე ანალიტიკური საქმიანობის მიმართულებით.

ამასთან, 2021 წელს სამსახური აქტიურად იყო ჩართული ერთობლივ ძალისხმევაში საერთაშორისო ტერორიზმთან და მასობრივი განადგურების იარაღის საფრთხეებთან ბრძოლის, სასაზღვრო უსაფრთხოების, კიბეროპერაციებსა და სხვა საგანგებო შემთხვევებზე რეაგირების მიმართულებით. ასევე, უმნიშვნელოვანესი იყო აღნიშნულ სფეროებში სახელმწიფო უსაფრთხოების სამსახურის შესაძლებლობების გაძლიერების მიზნით, ამერიკელი პარტნიორების მხარდაჭერა როგორც პროფესიული განვითარების, ასევე ცალკეული დანაყოფების ტექნიკური აღჭურვილობის კუთხით. საანგარიშო პერიოდში სამსახურის 100-ზე მეტმა წარმომადგენელმა მონაწილეობა მიიღო აშშ-ის მხარდაჭერით განხორციელებულ ათეულობით სხვადასხვა სასწავლო კურსში, გადამზადების პროგრამაში, საველე და სამეთაურო-საშტაბო სწავლებაში. აშშ-ის მხარდაჭერით, სამსახურის თანამშრომლები აგრძელებდნენ მონაწილეობას აშშ-ის საზღვაო ძალების სამაგისტრო სკოლის (NPS) გრძელვადიან სამაგისტრო პროგრამებში, ჯორჯ მარშალის სახელობის უსაფრთხოების სწავლებათა ევროპული ცენტრის (GCMC), სამართალდამცავთა საერთაშორისო აკადემიისა (ILEA) და აშშ-ის გამოძიების ფედერალური ბიუროს ეროვნული აკადემიის მიერ ორგანიზებულ სასწავლო კურსებსა და სემინარებში.

2021 წელს სამსახური აქტიურად განაგრძობდა ნატოსთან თანამშრომლობას და ჩართული იყო ნატო-საქართველოს არსებითი პაკეტის (SNGP) იმპლემენტაციის პროცესში. საანგარიშო პერიოდში სამსახურის წარმომადგენლებმა მონაწილეობა მიიღეს ნატოს პარტნიორობისა და თანამშრომლობის მენიუს (PCM), ნატო-საქართველოს პროფესიული განვითარების პროგრამისა (PDP) და ნატოს სამეკავშირეო ოფისის მიერ უსაფრთხოების მიმართულებით სხვადასხვა საკითხზე ორგანიზებულ ღონისძიებებში.

სამსახურის წარმომადგენლები აქტიურად იყვნენ ჩართული ნატოს მობილური აპლიკაციებისა და ტერორიზმისგან თავდაცვის საკითხებთან დაკავშირებულ კურსებში, ჰიბრიდული საფრთხეებისა და საქართველოს მდგრადობის საკითხებზე გამართულ შეხვედრებში, ასევე, ღია წყაროების მონიტორინგის შესახებ ტრენინგში. გაიმართა რამდენიმე საინფორმაციო შეხვედრა ნატოს კეთილსინდისიერების ამაღლების პროგრამასთან დაკავშირებით. ამასთან, სამსახურმა წარადგინა ინფორმაცია წლიური ეროვნული პროგრამის (ANP) ფარგლებში სახელმწიფო უსაფრთხოებისა და ტერორიზმთან ბრძოლის მიმართულებით ნაკისრი ვალდებულებების შესრულების კუთხით განხორციელებული აქტივობების შესახებ.

უსაფრთხოებისა და სამართალდაცვით სფეროში საერთაშორისო თანამშრომლობის მიმართულებით, სამსახურისთვის განსაკუთრებით მნიშვნელოვანი და პრიორიტეტულია ევროკავშირსა და მის სააგენტოებთან პარტნიორობის გაღრმავება. 2021 წელს სამსახური ჩართული იყო ორგანიზებული დანაშაულის წინააღმდეგ ბრძოლის მხარდასაჭერად ევროკავშირის ტექნიკური დახმარების პროექტით გათვალისწინებულ არაერთ ღონისძიებაში. აღნიშნული პროექტის ფინანსური მხარდაჭერით, 2021 წელს სამსახურის მიერ განხორციელდა მნიშვნელოვანი ინიციატივა - უსაფრთხოების ზამთრის სკოლა.

სამსახური ასევე აქტიურად მონაწილეობდა ევროკავშირი-ევროპის საბჭოს ერთობლივ პროექტებში. ამ მხრივ, განსაკუთრებით აღსანიშნავია „პარტნიორობა კარგი მმართველობისთვის“ (PGG II) პროექტის ფარგლებში განხორციელებული მნიშვნელოვანი აქტივობები კორუფციასთან ბრძოლის მიმართულებით.

სამსახურის შესაბამისი დანაყოფები, კომპეტენციის შესაბამისად, აქტიურად მონაწილეობდნენ ასოცირების შესახებ შეთანხმებისა და ასოცირების დღის წესრიგის განხორციელების ეროვნული სამოქმედო გეგმის იმპლემენტაციის, ასევე, საქართველო-ევროკავშირის ასოცირების 2021-2027 წლების დღის წესრიგთან დაკავშირებულ მოლაპარაკებებში. სამსახურმა მონაწილეობა მიიღო ასოცირების შეთანხმების ფარგლებში გამართული მართლმსაჯულების, თავისუფლებისა და უსაფრთხოების საკითხებზე თანამშრომლობის ქვეკომიტეტის შეხვედრაში. ასევე მნიშვნელოვანი იყო სამსახურის ჩართულობა საქართველოსა და ევროკავშირს შორის სავიზო რეჟიმის ლიბერალიზაციის სამოქმედო გეგმის შესრულების პროცესში.

ტერორიზმთან ბრძოლის მიმართულებით, სამსახური ეფექტურად განაგრძობდა საერთაშორისო პარტნიორებთნ ორმხრივი და მრავალმხრივი თანამშრომლობის ფორმატებში ჩართულობას. საქართველო არის „დაეშის“ წინააღმდეგ ბრძოლის გლობალური კოალიციის აქტიური წევრი მისი შექმნის საწყისი ეტაპიდან და აქტიურად მონაწილეობს კოალიციის სხვადასხვა აქტივობაში. 2021 წელს სამსახურის წარმომადგენლებმა მონაწილეობა მიიღეს გლობალური კოალიციის სამუშაო ჯგუფებისა და ქვეჯგუფების შეხვედრებში“, - ნათქვამია ანგარიშში.