უჩა მამაცაშვილის ადვოკატი: სასამართლოს გადაწყვეტილებას გავუგზავნით სახალხო დამცველს, რომელიც მისი გაცნობის შემდეგ საკუთარი პოზიციის არამართებულობაში დარწმუნდება

ბიზნესმენ უჩა მამაცაშვილის ადვოკატის, ამირან გიგუაშვილის განცხადებით, თბილისის საქალაქო სასამართლომ მხარეებს დასაბუთებული გადაწყვეტილება ჩააბარა. გიგუაშვილის განმარტებით, ეს გადაწყვეტილება მსგავსი კატეგორიის საქმეებზე ერთ-ერთი ყველაზე კომპეტენტური და დასაბუთებულია და მას სახალხო დამცველის გაუგზავნიან, რომელმაც სასამართლო მეგობრის სახელით უჩა მამაცაშვილის და ანტიკორუფციული მოძრაობის საქმეზე დასკვნა წარადგინა.

„ეს არის ვრცელი, სამოცგვერდიანი გადაწყვეტილება, სადაც მოსამართლემ დეტალურად შეაჯამა ყველა მონაწილე მხარის და მოწმის მოსაზრებები, არგუმენტები, მტკიცებულებები და მიიღო ერთ-ერთი ყველაზე ამომწურავი, კომპეტენტური და დასაბუთებული გადაწყვეტილება.

თავისთავად ის ფაქტი, რომ სასამართლოს გადაწყვეტილებაში მოყვანილი აქვს, როგორც უზენაესი სასამართლოს პრაქტიკა, ისე ევროპული სასამართლოს მნიშვნელოვანი განმარტებები ამ ტიპის დავებთან დაკავშირებით, კიდევ ერთხელ ადასტურებს გადაწყვეტილების დამაჯერებლობას და კომპეტენციის მაღალ ხარისხს.

სასამართლომ ცალსახად განმარტა, რომ ადამიანის პატივი და ღირსება არის შეუვალი, როგორც ამას ადგენს კონსტიტუცია და მისი შელახვა არ უნდა მოხდეს არც ერთ შემთხვევაში, მით უფრო ცილისწამებისა და ცრუ ბრალდებების ხარჯზე.

სასამართლომ ასევე გაიზიარა ჩვენი პოზიცია, რომ ე.წ. ანტიკორუფციულ მოძრაობას არ ჰქონდა არანაირი კვლევა ჩატარებული, როდესაც მისი სპიკერები ლაშა ფარულავა და ვასო ურუშაძე ცილს სწამებდნენ ბატონ უჩა მამაცაშვილს. შესაბამისად დადასტურდა, რომ ყველა ეს განცხადება იყო მათ მიერ დაგეგმილი ტყუილის კამპანიის ნაწილი.

ჩვენ ამ გადაწყვეტილებას გავუგზავნით სახალხო დამცველს და ვიტოვებთ იმედს, რომ გაცნობის შემდეგ, ის დარწმუნდება რამდენად სუბიექტური და უსამართლო იყო მისი, როგორც სახალხო დამცველის პოზიცია ამ დავაზე, როდესაც აშკარად მოუმზადებელი და ცალმხრივი დასკვნა წარუდგინა სასამართლოს. ასევე ჩვენ მზად ვართ ნებისმიერ დაინტერესებულ პირს და ორგანიზაციას დავუსხდეთ ნებისმიერ ფორმატში და დავუმტკიცოთ, როგორც ამ გადაწყვეტილების, ისე ჩვენი პოზიციების მართებულობას“, - აცხადებს გიგუაშვილი.