შსს: ომბუდსმენის დაუსაბუთებელი ბრალდებების მიზანია უწყების დისკრედიტაცია

შინაგან საქმეთა სამინისტრო სახალხო დამცველის ბრალდებებს პასუხობს, რომელიც თბილისის საკრებულოსთან გამართულ აქციას შეეხება.

შსს-ს განცხადებით, სახალხო დამცველის წარმომადგენლებს შსს-ს სისტემაში, დაკავებულ პირებთან ურთიერთობის, მათი მონახულების პრობლემა არასდროს შექმნიათ და ასე იყო აქციაზე დაკავებულებთან შეხვედრის შემთხვევაშიც. 

"სახალხო დამცველის წარმომადგენლებს, ობიექტური გარემოებების გათვალისწინებით, პირველივე ფიზიკური შესაძლებლობის შექმნისთანავე მიეცათ. ამდენად, გაკვირვებას გამოვთქვამთ სახალხო დამცველის მხრიდან აღნიშნული ფაქტის არასწორი ინტერპრეტაციის გამო. კიდევ ერთხელ ვაცხადებთ, რომ პოლიცია მოქმედებს კანონის ფარგლებში, პოლიტიკური ნეიტრალიტეტის პრინციპის დაცვით.

გამოვხატავთ შეშფოთებას, ვინაიდან სახალხო დამცველის მიერ პერიოდულად გაჟღერებული, დაუსაბუთებელი ბრალდებები ქვეყნის უმნიშვნელოვანესი სამართალდამცავი ორგანოს - შსს-ს მიმართ, რამაც ერთგვარი ტენდენციის სახე მიიღო, მიზნად ისახავს არა მხოლოდ ამ უწყების დისკრედიტირებას, არამედ ჩრდილს აყენებს თავად სახალხო დამცველის ინსტიტუტს.

სახალხო დამცველს მართებს, მიუკერძოებლად შეასრულოს კონსტიტუციური ორგანოს უმნიშვნელოვანესი ფუნქციები. მას, როგორც ომბუდსმენთა საერთაშორისო გლობალური გაერთიანების წევრს, ჯეროვნად უნდა ჰქონდეს გაცნობიერებული ომბუდსმენის ინსტიტუტსა და სახელმწიფო ორგანოებს შორის ურთიერთობების საუკეთესო პრაქტიკის მნიშვნელობა და მოქმედებდეს ობიექტურად, კრიტიკული დამკვირვებლის პოზიციიდან, მიმართავდეს ყველა ძალისხმევას, რათა მაქსიმალურად იქნას უზრუნველყოფილი ადამიანის უფლებების დაცვა მაღალი სტანდარტებით. ამ მიზნის მიღწევა კი შეუძლებელია დაუსაბუთებელი ბრალდებებით, ერთპიროვნული შეფასებებით, საზოგადოების შეგნებულად შეცდომაში შეყვანითა და სახალხო დამცველის ინსტიტუტის თვითდისკრედიტაციით", - წერია განცხადებაში.

დღეს სახალხო დამცველი უჩა ნანუაშვილი თბილისის საკრებულოსთან განვითარებულ მოვლენებს გამოეხმაურა. მან მოუწოდა სახელმწიფო უწყებებს არ შეაფერხონ მისი წარმომადგენლები საქართველოს კონსტიტუციითა და კანონით მინიჭებული უფლებამოსილების განხორციელებაში. 

10 ოქტომბერს თბილისის საკრებულოსთან მყოფ „ევროპული საქართველოსა“ და „ნაციონალური მოძრაობის“ წარმომადგენლებს შენობაში შესვლისა და სხდომაზე დასწრების საშუალება პოლიციამ არ მისცა. აქცია რამდენჯერმე ფიზიკურ დაპირისპირებაში გადაიზარდა, რის შედეგადაც 14 პირი დააკავეს.

დაკავებულები დღეს სასამართლო დარბაზიდან გაათავისუფლეს. პროცესი 17 ოქტომბერს ჩაინიშნა.

დაპირისპირება თაბორის მთასა და პუშკინის სკვერში დაგეგმილ პროექტებს მოჰყვა. სადავო პროექტებს მოგვიანებით საკრებულოს უმრავლესობამ მხარი მაინც დაუჭირა.