“აკურას“ საქმეზე, ადეიშვილი და მერაბიშვილი დამნაშავეებად სააპელაციომაც ცნო

დღეს, თბილისის სააპელაციო სასამართლომ არ გაიზიარა დაცვის მხარის სააპელაციო საჩივარი და უცვლელად ძალაში დატოვა 2017 წლის 3 მაისის ,,აკურას“ ღვინის ქარხნის უკანონოდ ჩამორთმევის ფაქტზე ივანე მერაბიშვილის და ზურაბ ადეიშვილის მიმართ თბილისის საქალაქო სასამართლოს მიერ გამოტანილი გამამტყუნებელი განაჩენი. ინფორმაციას საქართველოს პროკურატურა ავრცელებს.

საქმე ეხება 2004 წელს მაშინდელი გენერალური პროკურორის და უშიშროების მინისტრის ორგანიზებით, მეპატრონეების იძულებას, დაეთმოთ თელავში მდებარე ქარხანა.

პირველი ინსტანციის სასამართლომ დაადასტურა ყოფილი ჩინოსნების პირადი ინტერესები “შავი ზღვის ბანკის“ მიმართ, რომელზეც ეჭვობდნენ, რომ მისი მესვეურები ასლან აბაშიძის ხელისუფლებასთან იყვნენ კავშირში. მერაბიშვილი-ადეიშვილის გეგმით, სწრაფად უნდა მომხდარიყო ბანკის ლიკვიდაცია, ეს თანხები კი გადარიცხულიყო  მათ მიერ დასახელებულ ანგარიშებზე და მათზე წვდომა არ ჰქონოდათ ბანკის აქციონერებს. ხოლო იმ შემთხვევაში, თუ რომელიმე მსესხებელი ვერ შეძლებდა კრედიტის უკან დაბრუნებას, მაშინ მათგან უნდა მოეთხოვათ სახელმწიფოს სასარგებლოდ იმ უძრავ/მოძრავი ქონების დათმობა, რომლის შესაძენადაც გახარჯული ჰქონდათ ბანკიდან აღებული სესხი. 

“აკურას“ მეპატრონეებსაც ჰქონდათ სესხი აღებული ამ ბანკიდან, 2 600 000 ლარამდე ოდენობის, რითაც შეიძინეს ,,აკურას“ ღვინის ქარხნის აქციების 89.060%, განახორციელეს ღვინის ქარხანაში ინვესტიცია, გააშენეს ვაზი და ამუშავებდნენ ყურძენს.  მათ აჭარის პროკურატურაში სესხის 2 თვეში დაფარვა მოთხოვეს, წინააღმდეგ შემთხვევაში უსასყიდლოდ უნდა დაეთმოთ ქარხანა.

“ფსიქოლოგიური ზეწოლის ქვეშ მყოფმა თეიმურაზ მეგრელიშვილმა და ნოდარ მოდებაძემ  სამართალდამცავებისგან მოსალოდნელი გართულებების თავიდან აცილების მიზნით, გადაწყვიტეს დაეთმოთ ღვინის ქარხანა... ქონების ჩამორთმევის პროცესის დაჩქარების მიზნით, სამართალდამცავების ორგანიზებით, შუაღამით, სახლიდან საგანგებოდ გამოიყვანეს ნოტარიუსი და 2004 წლის 07 სექტემბერს ნოტარიული წესით გააფორმეს ჩუქების ხელშეკრულება, რომლის თანახმადაც თეიმურაზ მეგრელიშვილმა  და ნოდარ მოდებაძემ თელავში მდებარე „აკურას“ ღვინის ქარხანა აჩუქეს სახელმწიფოს“, - წერია. პროკურატურის მიერ გავრცელებულ განცხადებაში.

ივანე მერაბიშვილი და ზურაბ ადეიშვილი პირველი ინსტანციის სასამართლომ მაისში დამნაშავეებად ცნო და სასჯელიც განუსაზღვრა. ქარხნის მეპატრონეებს კი საკუთრება დაუბრუნდათ.