არჩილ კბილაშვილი: ჩატაევის პატიმრობიდან გირაოთი გათავისუფლება სწორი იყო

ყოფილი მთავარი პროკურორი არჩილ კბილაშვილი „ქართული ოცნების“ ხელისუფლებაში მოსვლიდან მალევე აჰმედ ჩატაევის პატიმრობიდან გირაოთი გათავისუფლებას სწორ გადაწყვეტილებას უწოდებს, – ამის შესახებ კბილაშვილმა ადვოკატთა ასოციაციის არჩევნებზე ადვოკატის რანგში ხმის მიცემის შემდეგ განაცხადა.

კბილაშვილმა განმარტა, რომ რამდენიმე დღის წინ ლიკვიდირებული აჰმედ ჩატაევის 2013 წელს გირაოთი გათავისუფლება საქმის მასალების საფუძველზე მოხდა.

„ესა თუ ის კონკრეტული სისხლის სამართლის საქმე, მათ შორის ჩატაევის, მე ვიცოდი და პროფესიულად მქონდა შეხება. მის შინაარსზე კომენტარი უნდა გააკეთოს პროკურორმა და არა ყოფილმა პროკურორმა. ჩატაევთან დაკავშირებით, რა მოხდა მისი გათავისუფლების შემდეგ, ამაზე მეტ შეფასებას ვერ გავაკეთებ.
სასამართლოს მისი გირაოთი გათავისუფლების შუამდგომლობით, მივმართეთ სისხლის სამართლის საქმის მასალების საფუძველზე“, – განაცხადა კბილაშვილმა.

კითხვაზე, ხომ არ იქონია გავლენა ჩატაევის გათავისუფლების შუამდგომლობაზე თბილისში და პანკისში მიმდინარე აქციებმა, კბილაშვილმა აღნიშნა, რომ შუამდგომლობა იყო საფუძვლიანი და ეს მიმართვა ემყარებოდა სისხლის სამართლის საქმის მასალებს.

„როდესაც არის კონკრეტული სისხლის სამართლის საქმე, პროკურორი უნდა გამოვიდეს საქმეში არსებული მასალებიდან და არა იმ ვარაუდით, რა მოხდება ხვალ, ზეგ და მაზეგ. არავინ ვიცით, რომელი ადამიანი სისხლის სამართლის საქმის დასრულების შემდეგ რას ჩაიდენს“, – განაცხადა კბილაშვილმა.

არჩილ კბილაშვილი მთავარი პროკურორი იყო 2013 წლის იანვარში, როდესაც საქართველოს მთავარმა პროკურატურამ ლაფანყურის საქმეზე დაკავებული აჰმედ ჩატაევის მიმართ, რომელსაც პროკურატურა მანამდე ასაფეთქებელი მოწყობილობის მართლსაწინააღმდეგო ტარებაში ადანაშაულებდა, დანაშაულის არარსებობის გამო, სისხლის სამართლებრივი დევნა შეწყვიტა. ამასთან, ჩატაევს გირაოს სახით გადახდილი 5 000 ლარიც უკან დაუბრუნდა.

სპეცოპერაცია, რომელიც 20 საათის განმავლობაში მიმდინარეობდა, 22 ნოემბერს საღამოს დასრულდა. სახელმწიფო უსაფრთხოების სამსახურის ინფორმაციით, დაკავებულია 1 ადამიანი, ხოლო სამი მოკლულია. სპეცოპერაციისას დაკავებული პირი საედ დუდაევია.

სპეცოპერაციის დროს, სამართალდამცველებსა და ტერორიზმში ეჭვმიტანილებს შორის შეტაკებას ერთი სპეცრაზმელი ემსხვერპლა, ოთხი კი დაიჭრა.

აჰმედ ჩატაევმა, თბილისში, 22 ნოემბერს ბერი გაბრიელ სალოსის ქუჩაზე, კონტრტერორისტული სპეცოპერაციის დროს, თავი აიფეთქა. ეს ფაქტი, დამნაშავეთა ცხედრების ექსპერტიზის შემდეგ, საქართველოს უსაფრთხოების სამსახურში დაადასტურეს.