საკონსტიტუციო სასამართლომ გიგი უგულავას სარჩელი არ დააკმაყოფილა

საქართველოს საკონსტიტუციო სასამართლომ საქმეზე „საქართველოს მოქალაქე გიორგი უგულავა საქართველოს პარლამენტის წინააღმდეგ“ განჩინება მიიღო. როგორც სასამართლოს მიერ გავრცელებულ ინფორმაციაშია აღნიშნული, მოსარჩელემ ვერ წარადგინა საკამარისი არგუმენტაცია.

“კონსტიტუციურ სარჩელში დავის საგანს წარმოადგენდა საქართველოს სისხლის სამართლის კოდექსის ის ნორმა, რომლის თანახმად, სასამართლო სასჯელში არ თვლის ვადას, რაც პირმა სხვა სისხლის სამართლის საქმის ფარგლებში გაატარა უკანონო პატიმრობაში, ანდა პატიმრობაში იმ საქმესთან დაკავშირებით, რომელზეც შემდგომ გამართლდა. მოსარჩელის პოზიციით, სადავო ნორმა ეწინააღმდეგება საქართველოს კონსტიტუციის მე-18 მუხლს (ადამიანის თავისუფლების ხელშეუვალობის უფლება).  საქართველოს საკონსტიტუციო სასამართლომ განმარტა, რომ მოსარჩელეს არ წარმოუდგენია არგუმენტაცია, თუ რატომ მიიჩნევს, რომ გასაჩივრებული რეგულირება ზღუდავს ადამიანის თავისუფლების ხელშეუვალობის უფლების ცალკეულ ასპექტებს. აქედან გამომდინარე, საქართველოს საკონსტიტუციო სასამართლომ დაადგინა, რომ კონსტიტუციური სარჩელი №766 დაუსაბუთებელია და არსებობს მისი არსებითად განსახილველად არმიღების „საკონსტიტუციო სამართალწარმოების შესახებ“ საქართველოს კანონის მე-18 მუხლის „ა“ ქვეპუნქტითა და მე-16 მუხლის პირველი პუნქტის „ე“ ქვეპუნქტით გათვალისწინებული საფუძველი”,- აღნიშნულია ინფორმაციაში.

განჩინება საქართველოს საკონსტიტუციო სასამართლოს პირველმა კოლეგიამ მიიღო. დავის საგანი კი იყო საქართველოს სისხლის სამართლის საპროცესო კოდექსის 269-ე მუხლის მე-4 ნაწილის კონსტიტუციურობა საქართველოს კონსტიტუციის 18-ე მუხლთან მიმართებით.

ნაციონალური მოძრაობის ყოფილი წევრი და თბილისის ყოფილი მერი გიგი უგულავა ახლა პარტია "ევროპული საქართველოს" გენერალური მდივანია. ის 2014 წელს დააპატიმრეს. სახელმწიფო მას რამდენიმე კორუფციულ დანაშაულში ედავებოდა. სისხლის სამართლის პირველი ბრალდებები უგულავას 2013 წლის თებერვალში წაუყენეს - მაშინ ის თბილისის მერი იყო; მან საპატიმრო, სააპელაციო სასამართლოს განაჩენის თანახმად, 2017 წლის 6 იანვარს დატოვა.  გიგი უგულავა ბრალდებულია ასევე ტელეკომპანია "იმედის საქმეზე", თუმცა ამ ეპიზოდზე პატიმრობა შეფარდებული არ აქვს. "იმედის საქმეზე", რომელიც მოიცავს ყოფილი ხელისუფლების იმ მაღალი თანამდებობის პირების საქმეებს, რომლებიც 2007 წლის ნოემბრის მოვლენების დროს გადაწყვეტილებებს იღებდნენ, სასამართლო გამოძიება ჯერ არ დასრულებულა.