საქალაქო სასამართლომ ე.წ. ქოლცენტრების საქმეზე ელისო კილაძეს, ოთარ ფარცხალაძეს და მათთან ერთად ბრალდებულ სხვა პირებს აღკვეთის ღონისძიების სახით პატიმრობა შეუფარდა

თბილისის საქალაქო სასამართლომ ე.წ. ქოლცენტრების საქმეზე ბრალდებული ექვსივე პირს აღკვეთის ღონისძიების სახით პატიმრობა შეუფარდა. მათ შორის არიან: ოთარ ფარცხალაძე, ძმები მიქაძეები, მიხეილ ჩოხელი, ირაკლი სეხნიაშვილი და ელისო კილაძე. ბრალდებულთა ნაწილი მიმალვაშია, შესაბამისად, სასამართლომ მათთვის აღკვეთის ღონისძიების შეფარდებაზე დაუსწრებლად იმსჯელა. პროცესი დახურულ რეჟიმში ჩატარდა.

როგორც საქმის პროკურორმა მარიამ ბერძენიშვილმა სასამართლო პროცესის დასრულების შემდეგ განაცხადა, ბრალდების მხარემ შუამდგომლობაში მიუთითა, რომ არსებობდა მიმალვის, დანაშაულებრივი საქმიანობის გაგრძელებისა და მოწმეებზე ზემოქმედების საფრთხე.

„სასამართლომ გაითვალისწინა ბრალდების მხარის შუამდგომლობა აღკვეთის ღონისძიებასთან დაკავშირებით და ექვსივე ბრალდებულის მიმართ გამოყენებული იქნა პატიმრობა. ელისო კილაძე და გიორგი მიქაძე არ არიან მიმალულები, შესაბამისად, ისინი განთავსდებიან პენიტენციურ დაწესებულებაში.

ბრალდების მხარემ ექვსივე ბრალდებულთან მიმართებით დაასაბუთა აღკვეთის ღონისძიების როგორც ფაქტობრივი, ისე ფორმალური საფუძველი. კერძოდ, ბრალდების მხარემ მიუთითა, რომ მიმალვის, დანაშაულებრივი საქმიანობის გაგრძელების და მოწმეებზე ზემოქმედების საფრთხე არსებობდა, რაც სასამართლომ გაიზიარა“, - აღნიშნა პროკურორმა.

პროცესის დახურვასთან დაკავშირებით ელისო კილაძის ადვოკატმა ვალერი გელბახიანმა განაცხადა, რომ „დახურულ კარს მიღმა სასამართლო უკვე აღარ არის სასამართლო“.

„თავისთავად ეს ფაქტი მოწმობს იმაზე, რომ რაც გააჟღერა ბრალდების მხარემ, ეს არის არის სავალდებულოდ მოსასმენი მოსახლეობისათვის, მაგრამ საპირისპირო არგუმენტები მოსახლეობამ არ უნდა მოისმინოს და უნდა ჩათვალოს, რომ რაც თქვა ბრალდების მხარემ ეს არის სწორი“, - განუცხადა ვალერი გელბახიანმა ჟურნალისტებს.

პროცესის დახურვის შესახებ განმარტება გააკეთა პროკურორმა მარიამ ბერძენიშვილმა.

„აღნიშნულ სისხლის სამართლის საქმეზე გამოძიება ინტენსიურ რეჟიმში მიმდინარეობს, არის კომპლექსური ხასიათის ტრანსნაციონალური დანაშაული, იკვეთება არაერთი პირი, მოწმეები გამოკითხვის ოქმებში მიწოდებულ ინფორმაციაში ბევრ გარემოებაზე საუბრობენ. შესაბამისად, იმისათვის, რომ მათი პირადი და ოჯახის წევრების უსაფრთხოება იყოს დაცული, ბრალდების მხარემ მიიჩნია, რომ ამ ეტაპზე პროცესის დახურვა აუცილებელი იყო, - განაცხადა პროკურორმა.

მან ასევე ისაუბრა სხვა ბრალდებულებთან ნაცნობობაზე ელისო კილაძის განცხადებასთან დაკავშირებით.

„რაც შეეხება ელისო კილაძის მიერ გაკეთებულ განცხადებას, რომ ის არ იცნობს სხვა ბრალდებულებს - გივი ჯიბლაძეს, გიორგი კამლაძეს, ბენ ანორს, თორნიკე ჯანელიძეს, მას დიდი ხნის ნაცნობობა აკავშირებს და ამას არც თვითონ უარყოფდა დღეს პროცესის მიმდინარეობისას. მან დღეს დაადასტურა დავით მიქაძესთან და ირაკლი სეხნიაშვილთან ახლო მეგობრობა, ასევე დაადასტურა, რომ გიორგი მიქაძეს იცნობს; მხოლოდ განმარტა, რომ ოთარ რომანოვ-ფარცხალაძეს არ იცნობს. მანვე განმარტა, რომ მას არ ჰქონდა ქოლცენტრები, სხვა შემთხვევაში მის მხილებასაც მოახდენდა“, - განაცხადა მარიამ ბერძენიშვილმა.

ჟურნალისტი ელისო კილაძე ე.წ. ქოლცენტრების საქმეზე გუშინ დააკავეს. ამავე საქმეზე, სისხლის სამართლებრივი დევნა დაიწყო ათი პირის მიმართ, რომელთა შორის არის საქართველოს ყოფილი გენერალური პროკურორი ოთარ ფარცხალაძე.