ხახუბიას გარდაცვალების საქმეზე გამართულ პროცესზე სამხრე კამერების ჩანაწერები შეისწავლეს

‌გორის რაიონულ სასამართლოში ბექა ხახუბიას გარდაცვალებაში ბრალდებული პატრულის თანამშრომლების საქმის არსებითი განხილვა გრძელდება. დღეს სამხრე კამერების ვიდეო-აუდიო ჩანაწერები შეისწავლეს, რომელიც ავარიის შემდგომ ვითარებას ასახავს, ასევე დიალოგი საპატრულოს უფროსის მოვალეობის შემსრულებელთან, მერაბ ძაბირაძესთან სადაც, პროკურორის განმარტებით, ერთ-ერთი ბრალდებული, ზურაბ რუსიშვილი ამბობს, რომ გზა 207-ე ეკიპაჟმა გადაკეტა.

მეორე ჩანაწერში პატრულის თანამშრომლის და ბექა ხახუბიას ძმის ცოლის საუბარია, სადაც ის ჰყვება, თუ როგორ დააკავეს ბექა ხახუბია თბილისში, დაადეს მას ბორკილები და წაიყვანეს განყოფილებაში, თუმცა რატომ და როგორ გაათავისუფლეს ის შემდეგ, მისთვის უცნობია.

ამის შესახებ მომდევნო ჩანაწერში გარდაცვლილის ძმაც საუბრობს. ერთ-ერთ ჩანაწერში ისმის მამაკაცის ხმა - ეს რა ვქენი?! მე მოვკალი... ამ სიტყვების ავტორი კადრებშიც ჩანს, თუმცა ბრალდების მხარემ განაცხადა, რომ მათთვის უცნობია, ვინ არის ეს პიროვნება. ეს პასუხი დაცვის მხარისთვის მიუღებელი აღმოჩნდა და დასვა კითხვა, ხომ არ იყო ეს პიროვნება კავშირში ამ საქმესთან და კონკრეტულად ხახუბიას პოლიციის განყოფილებიდან გათავისუფლებასთან. პროკურორის განცხადებით, ეს პიროვნება ბრალდების ინტერესს არ წარმოადგენს. ეს ჩანაწერები კი დაცვის მხარეს 2017 წლის აგვისტოდან ჰქონდა და ამ პიროვნების ვინაობის დადგენა მათაც შეეძლოთ. მომდევნო პროცესი 25 იანვარს და 2 თებერვალს ჩაინიშნა.

პარლამენტის წევრის, ფოთის მაჟორიტარი დეპუტატის, ირაკლი ხახუბიას შვილი, 21 წლის ბექა ხახუბია ავტოავარიას 17 მაისს ემსხვერპლა. მას გორის გვირაბთან სატვირთო ავტომანქანით გზა გადაუკეტეს. ბრალი 3 პოლიციელს წარუდგინეს, თუმცა 11 აგვისტოს სასამართლომ ისინი 1000 ლარიანი გირაოს სანაცვლოდ გაათავისუფლა. ოქტომბრის დასაწყისში ბრალდებულებმა მათ მიმართ სისხლის სამართლის საქმის შეწყვეტა მოითხოვეს.