მეტროში ხულიგნობისთვის დაკავებულებს ჯარიმა დააკისრეს

თბილისის საქალაქო სასამართლომ თბილისის მეტროში ხულიგნობისა და წინააღმდეგობის გაწევისთვის დაკავებული ორი პირი კანონდამრღვევად სცნო და სასჯელის სახით 1 000 და 5 00-ლარიანი ჯარიმა დააკისრა. ინფორმაციას On.ge ავრცელებს.

სასამართლოზე ბრალდების მხარემ მტკიცებულების სახით წარადგინა მეტროში დამონტაჟებული და პოლიციელების სამხრე კამერის ვიდეო ჩანაწერები. ჩანაწერებიდან ერთი ინციდენტს სრულად ასახავს, დანარჩენები კი ფრაგმენტულია.

ვიდეოში ჩანს, როგორ მივიდა პოლიციელი გიორგი სალაგაძესთან და სამართალდამცველის  შეურაცხყოფის გამო დააკავა, მოგვიანებით დააკავეს მისი თანმხლები პირი თეიმურაზ მენაბრიშვილიც. ბრალდების მხარემ წარადგინა ალკოტესტის მონაცემებიც, რომლის მიხედვითაც დაკავებული გიორგი სალაგაძე ალკოჰოლური თრობის ქვეშ იმყოფებოდა.

ადვოკატის თქმით, სალაგაძეს ალკოტესტის ჩვენება გასულ დღეს მიღებული ალკოჰოლის გამო დაუდგინდა. ადვოკატები სასამართლო გადაწყვეტილების გასაჩივრებას გეგმავენ.

გიორგი სილაგაძე და თეიმურაზ მენაბრიშვილი პოლიციამ 28 იანვარს მეტროსადგურ თავისუფლების მოედანზე დააკავა. დაკავების კადრები სოციალური ქსელით გავრცელდა. ვიდეოში ისმოდა, რომ დაკავებულიც და ირგვლივ მყოფი მოქალაქეებიც პოლიციელისგან დაკავების მიზეზების განმარტებას ითხოვდნენ.

ინციდენტის მეორე დღეს, 29 იანვარს, შს მინისტრის მოადგილემ, ნათია მეზრიშვილმა ამ საკითხთან დაკავშირებით პრესკონფერენცია გამართა. მეზვრიშვლის თქმით, დაკავების მხოლოდ ნაწილია ასახული მოქალაქის მიერ სოციალურ ქსელში გავრცელებულ ვიდეოში და ინციდენტის ამსახველ სრულად ვიდეოს სასამართლოში წარადგენდნენ.

საქმეზე გამოძიება ადმინისტრაციულ სამართალდარღვევათა კოდექსის 166-ე და 173-ე მუხლებით მიმდინარეობდა, რაც წვრილმან ხულიგნობას და სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას გულისხმობს.