ლაშა კაციაზე პოლიციელების შესაძლო ზეწოლის საქმეს პროკურატურა და პოლიცია სწავლობენ

მუსიკოსი ლაშა კაცია პოლიციელებს ფიზიკურ და სიტყვიერ შეურაცხყოფაში ადანაშაულებს. კაციას თქმით, პოლიციელებმა მას სცემეს, შეურაცხყოფა მიაყენეს და დამცინავად მოექცნენ. კაცია ჰყვება, რომ პოლიციელები ემუქრებოდნენ დაჭერით, ნარკოტიკის ჩადებითაც. ინფორმაციას "ლიბერალი" ავრცელებს.

მუსიკოსის თქმით, მან პოლიციელებისგან მოითხოვა, რომ ვინაობის დასახელება და პირადობის წარდგენა, თუმცა უარი მიიღო.

"შემდეგ დაიწყეს ჩემს პირადობაზე სურათების გადაღება, რაზეც ვკითხე, თუ რატომ აკეთებდნენ ამას. შემდეგ დაიწყეს ჩემს მიმართ დამცინავი დამოკიდებულება. ცდილობდნენ, მხრით დამჯახებოდნენ. რამდენჯერმე მოვახერხე, რომ ამეცილებინა. შემდგომ პირადობის დაბრუნება, რომ დაიწყეს, იყო დამცინავი დამოკიდებულება - უშუალოდ ხელში არ მაწვდიდნენ, ხან მარჯვნივ გაწევდნენ, ხან მარცხნივ, „აბა გამომართვი, აბა გამომართვი, რატომ არ მართვევ“, - ასე მაწვალეს დაახლოებით 2 წუთის განმავლობაში“, - ამბობს ლაშა კაცია.

მისი თქმით, პოლიციელებს ასევე ჰკითხა, ჩართული ჰქონდათ თუ არა კამერა, რაზეც უპასუხეს, რომ კამერები არ ჰქონდათ და ჩართულიც ვერ ექნებოდათ. ამის გამო, კაციამ თავად გადაწყვიტა მობილურით გადაღება, რაც პოლიციელებმა შეურაცხყოფად აღიქვეს.

მისი თქმით, შემდეგ მანქანის გადაღებაც უნდოდა, რადგან იყო სამოქალაქო მანქანა და არ იყო საპატრულო ეკიპაჟის მანქანა. როდესაც ეს დააპირა, ერთ-ერთმა პოლიციელმა მას მობილური გამოსტაცა, ორმა პოლიციელმა კი მანქანაში მისი ძალით ჩასმა დაიწყეს. 

მისი თქმით, პოლიციის თანამშრომლებმა მანქანა სახლიდან დაახლოებით 50 მეტრის მოშორებით გააჩერეს, სადაც ფიზიკურად გაუსწორდნენ, სიტყვიერი შეურაცხყოფა მიაყენეს. კაცია იხსენებს, რომ ამ მდგომარეობაში დაახლოებით 10 წუთის განმავლობაში ჰყავდათ. შემდეგ კი მათთან, თეთრი შკოდით კიდევ ერთი მანქანა მივიდა.

კაცია იხსენებს, რომ შემდეგ ბორკილებდადებული გლდანი-ნაძალადევის მე-2 განყოფილებაში გადაიყვანეს. ითხოვდა ადვოკატსა და ზარის უფლებას, თუმცა რამდენიმე საათის განმავლობაში ეუბნებოდნენ, რომ 5 წუთში დაარეკინებდნენ. მისი თქმით, როდესაც განყოფილება დატოვა და მობილური ტელეფონი დაუბრუნეს, გადაღებული ვიდეოები ტელეფონიდან წაშლილი იყო.

კაცია იხსენებს, რომ პოლიციელები აშინებდნენ დაჭერით, ეუბნებოდნენ, რომ რაღაც მიზეზს მოუდებდნენ და დაიჭერდნენ, ჩაუდებდნენ ნარკოტიკს.

„ერთ-ერთი, რომელიც ყველაზე დიდი აგრესიით გამოირჩეოდა, მეუბნებოდა, შენ ხომ არ გგონია, რომ რამე შეიცვალა, ზემოთ ხალხი შეიცვალა, ქვემოთ კი ისევ ისინი დარჩნენ. შეიძლება უარესი დაგემართოსო, ჩემი დაშინება უნდოდათ, რომ ეს კიდევ ყველაფერი არ იყო, რაც კი მელოდა წინ... მანქანაში მითხრეს - შენნაირი ადამიანები აჩენენ უნდობლობას პოლიციის მიმართ, შენ რომ ასე იქცევი, იმიტომ არ უყვარს ხალხს პოლიციაო. დაისჯები, რადგან არ გიყვარს პოლიციაო“, - ამბობს კაცია.

კაციას საქმეზე მთავარმა პროკურატურამ პოლიციელების მხრიდან უფლებამოსილების შესაძლო გადამეტების ფაქტზე დაიწყო გამოძიება საქართველოს სსკ-ის 333-ე მუხლის მესამე ნაწილის ბ ქვეპუნქტით.

კაციას მიერ გავრცელებული ინფორმაციის საფუძველზე კი, შინაგან საქმეთა სამინისტროს გენერალურმა ინსპექციამ მოკვლევა დაიწყო.